OYAN, menaliwa ne naman a planu
Ing mal ta’ng pamuntuk a pabayu-bayu
Isip, at nu’ kaybat nang gingkas, balamu
Biru mu kaya ing bignus nang amanu.
Antimo ing ngana subali kang Bongbong
(Marcos) ya ala neng buring iendorsong
Mamalit keya king lakwan nang posisyon,
‘Right after his 6th year term on 30th of June’.
Pero oyan na pin kabud-abud namu
I Bong Go ing keyang ken susubung rugu
Ban tagal antimong Pamuntuk, marayu
King orihinal a planu nang malagu.
Ing yang iendorsu na i Bongbong Marcos
King kandidatura ning tau Ilocos
Antining ya kabud aligan nang lubos
Ban mibayu piblas ing bansa tang irog.
Makapagmulala ing ngeni kabud na
Mibalita king ya tagal ya pin ngara,
Subali king ya mu naman ken talaga
Ing matning sinabing kumandidatu ya
Bilang ‘vice president’ at ken ing katiket
Na pin i sir Bong Go ‘Some felt so frustrated’
King gewa na bilang ‘Philippine president,’
A e karaniwan: ‘He’s none of self respect’.
At linto yang alang metung a salita
Agpang king ikit tang asna king kasala
A ing ya king bignus ning sariling dila,
Iti karing adwang ilug ya mamangka.
Tabalu mupin nung yan e mu diskarte
Ning ngara pin respetadung presidente,
Pero para karing aliwa’y Duterte,
Ala yang keliwan kareng kaliwete.
Maboka yang bina ing pamuntuk tamu
At mas dakal pa ing bage e seryosu
Ing buri nang yapse arap ning publiku,
A e tamu kapad, kepintas nang ustu.
Antimo ing ngeni balita tagal ya
Bilang ‘vice president’ pin a ka-tandem na
Ning Bong Go, ken ating kasebyan a ngara,
I Digong dilpak ne’ing sariling tari na.
Inya keng biling yan, a nu’ aliwa ne
Ing katiket niti bilang presidente,
Imbes i BBM, i Go ing inabe
Nang Digong lalu yang alang asalese.
At nu’ i Duterte ing sinabi mismu
Ing ala na mekad munye pamagbayu
King bansa nu’ne mu Bongbong ing pihu,
Wayni ing gingkas nang atandanan tamu.
Ing ya adwa ya mang pulung banwang lukluk
Ken king Malakanyang antimong pamuntuk,
E na alinis ing miayaliwang buluk
A midalamat na, kilwal niti’t kilub.
“Mayntun tamung metung pang anti kang Marcos”
Nganing malino king publiku na bignus:
A ngana i Bongbong Marcos mu ing bukud
Map’ pisanmetungan tamung ken ilukluk.
At saka mo ngeni aliwa i Bongbong
Ing maging kasangga na keng ‘next election?’
Ken magkamali yang maragul i Digong
King kelan na niting malino direksyon.
At lalto king ala yang delikadesa
At meto’ salita ngara ring makatwa
Ing taung sinabi ne ngeni, kaybat na
Aliwa ne naman, nanu ing aus da?
Magulyan? (Ay ali!) Ing pabayu-bayu
Salita king medyu simpli mung amanu;
Ing kekatamu e pamanamak tau,
Nu’ne palantik nung ike king kabayu!
