1.
Potang ala naku;
at ing kompyuter ku king tudturang silid
e ne makasindi;
kalupa ning sadiang pane yung akakit
at keta ala na;
pati itang keni kanita dusuldit
a daramdaman yu;
neng kapitangan na ning benging tahimik
ing mainang lagutuk;
ning keyboard e yu na damdamang unabis
anti mo’ing kanita;
ding kakung taliri teterak lang aplit
karing letra niti;
neng ing kakung obrang anti mong columnist
paki-aryan ke ing;
kanakung susulat ban bukas mi-publish
2.
Ken yu na marahil;
lubus abitasa king kekong sarili
ing aku a sadiang;
kilub niti pane ing aku mung dili
manibat kanitang;
meko ya’y ima yu pigsalbatan ku’yti
migpakatatag ku;
at serilinan ing dusa at palsimi
a kakung kikiakan;
kilub ning silid ku alus bengi bengi
gewa kung panapalak;
king pamangulila king sinta kung bandi
ing alang patugut;
at e ku sewan a susulat neng bengi
anti`ning ya kabud
kening kanakung bie mekakaba iti
3.
Sana ding nanu mang;
kakung pipagalan a bungang paniulat
at aliwa pang ken;
maulagang bage a kanakung tangkap
e yu la pabusten;
nung nu la ngan atyu deti makayasad
matagin uli ning;
asisiguru kung king aldo ning bukas
Deti migit la pa;
king ipamana kung pibandian a ditak
kekayu kanakung;
masuyu ampo pang maganakang anak
a e pepasukal;
lub kaku ampo pang pabalang mekibat
kaku’t kang ima yu;
angga na king tawling siguk mi ing miras
4.
At potang ing Guinu;
a kaku peparam kening bitbit kung bie
baywan na na kaku;
iti e yu dapat mu mang ikalumbe
nun e panalangin;
ing king Guinung Dios ing keko’ng idake
king oras a ita;
para king kanakung tawling pamaglakbe
ing mipatawaran;
keya ing kanakung sala yang matibe
guebnan a paynturu;
king payapa ampo pang alanganggang bie
a pengaku na ning;
Dios a Guinu tamu a sinubling mebie
at pepaytas babo;
ban king kayarian ning ibpa akayabe
5.
Ing egana-gana;
atin kapupupusan keti king karinan
na ning lua ngana ning;
santong kasulatan da ring taung banal
nung inia ing mate;
ya ing tau e ta dapat pagmalunan
lalu’t king meging bie;
na keti kng yatu linto yang marangal
aku e ku meging;
sakit nang buntuk ning kekatang lipunan
angga king metua ku’t ;
mirate king kama a kakung pigkeran
a nung nu king tawling;
aldo at oras ning kakung kamatayan
mebie kung matapat;
at e maging taksil king kakung balayan
(Poeta Laureado (International) Felix M. Garcia Sr./Agosto 4, 2021)
