PLATAPORMA de gubyernu, pamalak la at programa
ding mengangas linibutad king labuad ning pulitika;
masampat la kapakayan, king aplit dang babandera
at pasuala, king oras ning karelang pamangampanya;
iti metung a paralan, king ban akua ro’ simpatya
ring memalen, a kareti, aligan dang mie suporta.
King mayumung amanu ra, dakal la ayayamuyut
karing sablang makiramdam a karela makarungut,
lakwas potang sasabian dang ibayu ra ing mabuluk
a sistema king gibyernu, ustung ila ring milukluk;
inia ring e mapanyuri, malagua lang mayayabluk,
at ila retang menasa ding abibilug da buntuk.
Ding aliwang kandidatu, mengari la namang watas
neng mamapse lang amanu ring dila rang mabulaklak;
asusuldung do’ lingapngap pelalung ding pekamalyap
a botanting sinawa na king pangakung mababangnas;
uli ning matenakan la makalamang la ring ditak
karetang mamulitikang e pa sane mamuladas.
Balang metung, ating nasa, para king mal dang balayan
king pamangampanya reti, pane tamung daramdaman;
ing sulusyun king prublema, balu ra ngang taladtaran
pati ing meging yamut nung nukarin ngan menibatan;
inia ninung e manwala a mayap la kapakayan
at sumuyu kekatamu a mipnu king katapatan?
Dapot nu’ anti katibe, itang sumpang pamitag da,
a magserbisyu lang tutu king balen at karing masa?
pablasang king mengalabas a panaun mesubuk na,
mapapaku ing pangaku, potang manungkula’na la;
plataporma de gubyernu, a kekata’ pangara ra,
liyus king yan mibalayun, oyta’ linto alang kuenta.
Makiramdam tamu karing plataporma de gubyernu
o pamalak a programa da ring balang kandidatu,
karen ta manalumpakan at e ketang nung magkanu
itang agyu rang ibayad kapalit ning keko’ng botu;
ati’namang tutu karing tatagal a pulitiku,
dependi king panugali at ning klasi pangatau.
E ta’ sana bisu-bisu king kekatang pamamilî,
sanakan lang miyamas-amas, ba’tamung e magkamalî;
e tamu sana paisilo king kislap na ning salapî
at king mayumung amanung yapse ring karelang labî;
ibotu la ring balu yung ating mayap a ugalî
at ayaliga’ning balen potang malugma ya bilî..
Uling kabud mipasala ing kekatang kapagnasan,
makapiluluk matino king nanu mang katungkulan,
pakabitasan ta’ng lubus e magbayu kapilan man
ing ngeni e masanting a keng gubyernu kalakaran;
agiang kamaganak me pa, iti e me dapat yalal
nung balu mung e ya sukat ipuk iti king tungkulan.
At agiang masalapi ya. at dirinan na kang kualta
king ba’mia mung ibotu iti, e me ipaglibe kaya
ing maulaga mung botu uling kabud sinambut ya,
ding tunggal libu nang pemie, milyones ing kapalit da,
a isingil na niti king kaban-balen kalukluk na,
sakali’t akua na niting keng alalan sumambut ya.
Pero nung mangailangan ka at ala kang pilisunan
o ayandam nung atin kang maigpit pamangailangan,
kuanan mu’la ring babie na, dapot e me bubuto yan;
Arapan na ning Ginung Dios ala kang kapakibatan
uling ding keka binie na e mo’inawad o inutang,
nun’e reti kusa na lang king palad mu pepasakmal!
Vhelle V. Garcia
Enero 8, 2019
Abu Dhabi, UAE
