MISAN, ing Ginung Dios ampo y Satanas
Miagnan lang migpasyal king metung a Night Club,
Gagaligatsu lang sinaganang agad
Ding babaing disan dang teterak ubad.
Karakal ding ‘fans’ kung disan ta ken ngana
Ning Satanas kang Lord kabang mamilang ya;
Tara king pisamban nganing Ginu kaya,
Karin din kanaku ipakit ko’ keka.
Karas da sentru na nitang kabalenan
A nu’ ing munisipyu atiyu mu naman,
Sapak yang tau ing kilub ning pisamban
Karing sinimba at bisang mangumpisal.
Ating makasiklod kabang mangadi la,
Ating mipagkwentu oras na ning misa;
Ating matudtud a balamu puyat ya
Ating kabud mu ken mipapagsitsirya.
“Satanas” nganing Dios, “ngamu pa’ya karen
Karakal a taung disan ta’ ngeni ken?”
“Ding kaku” ngana ning kitnan, “ila pin den
A mipagkwentu mu lele na ning Birhen;
At deng manalangin tapat ilang keka,”
Ngana pang memuska king Ginung Dios keta;
“Kasi dakal la pin sana ring sisimba,
Pero ding aliwa e laus king lub da”.
Inya nung anti yan king mata ning Ginu
Ing malilyari king mabilug a yatu,
E la pin kaya mas mikarakal pihu,
Ding miras kang Satan karin king Impyernu?!
Ding Apulung Utus
MADALAS, abe reng sisimba i Pisuk
Di Atsi na, ken king bisitas Tulauc;
Babasan na la ring makasulat kilub
Dane na ning ating makapaku king krus.
At king sarili nang bubut a pamisip
Kukutang na niti ing sangkan nung bakit
Dane wanan nang ‘Christ’ karin dala kebit
Ding makasulat a letrang makalukib.
Inya makanyan nang aisip ikutang
Kang Atsi na, oneng e ne pakibatan,
Nu’ne ngana kaya “Ima’ing kekang kutnan
King ba’mong abalu tune kabaldugan.
E ne ne kitnan pang pasibayung Pisuk
I Atsi na uling madalas malaut
Ing pakibat niti a lulwal king asbuk,
Nung inya king Ima ya migmasikan lub.
“Nanu la pu reng ‘Ten Commandments’ awsan da?
“Anak, apulu lang utus ning Dios deta,
A sukat igalang at pamintwan” ngana
“Ban milisya tamu king pamikasala.
Ing Ginung Miglalang o Mayupayang Dios
Ing minye pin kareting ‘Apulung Utus’
Inya ren dapat lang mipamintwan lubus
Ban e ta’ manabu karin king Impyernus”.
“Nung makanyan Ima, mas mayupaya ka
Kesa king Dios” ngana, “uling mas dakal la
Ding keka, a kaku pane yutus keta
Manibat king abak, angga na pa pota!”
