Kung walang protektor o sinasandalan
Ang mga may-ari ng malaking ‘hog farms’
Na patuloy pa rin ang ‘operation’ niyan
Sa kabila ng matinding karaingan
Nitong apektado sa masamang amoy
Na tiyakang sanhi ng dumi ng baboy;
Ano ang posibleng nasa likod nitong
Pamamayagpag niyan magpa-hanggang ngayon?
At papano sila nakapag-‘operate’
Ng walang anuman yatang ‘certificate’
Na inisyu itong ating ‘Bureau of Health’
Partikular ang ‘Environment Management?’
Kataka-taka rin namang masasabi
Kung bakit ang mga naturang ‘piggery’
Ay naitayo ng walang ‘permit’ pati
Base sa pahayag yata ng Alkalde?
Kung saan inabot na ng ilang taon
Ang problema hinggil sa mabahong amoy
Ay di kumilos ang ‘Office of the Mayor’
O ang alin man yatang tanggapan noon?
Kaya nga sa puntong yan kung tutuusin
Ay kwenta minana lang ni Mayor Carling
At ng kanyang Bise itong suliranin
Na noon pa dapat nabigyan ng pansin?
Pero ngayong di na lingid sa tanggapan
Ng bagong Mayor at Sangguniang Bayan
Ang problemang dapat nilang solusyonan,
Di ba’t marapat lang na magsikilos yan?
Upang ipatigil ang pamemerwisyo
Ng mga ‘hog farms’ na lubhang delikado
Sa kalusugan ng nakatira rito
Na di kalayuan sa ‘piggeries’ na ito.
At sa marami pang posibleng damay din
Sa matinding amoy ng mga nasabing
‘Piggeries’ na aywan kung kasosyo na rin
Ang ilang lokal na opisyales natin
Kung kaya iligal man ang ‘operation’
Ng mga yan ay di nila kinukwestyon;
Sukdang isugal ang kalusugan nitong
Mga mamamayang apektado roon?
O ‘untouchables’ ang mga may-ari niyan
Kaya’t si Gob man ang tuwirang makialam
Ay tila kampante pa rin ang mga yan
Kahit sampahan ng kaso kung kailangan.
At kung saan pati iba’t-ibang sektor
Ay suportado rin, gaya nga po nitong
PGKM at Kilusang Kontra Amoy,
Upang humupa ang namumuong tension
Sa pagitan nitong mga residente
At ‘operators’ ng naturang ‘piggery,’
Na aywan kung bakit liban sa Alkalde
Ay wala rin yatang gumagawa pati
Ng mabisang aksyon upang matuldukan
Ang problema’t matagal ng karaingan
Nitong apektadong mga mamamayan
Sa napakabahong amoy ng mga yan.
Nang di humantong sa higit na mahirap
Lutasin ang isang problemang di hamak
Madaling gamutin sa mangandang usap,
Kaysa idaan sa patayo at dahas!
