makalula la reng pera, e lamu barya-barya
midadatuk kareng bulsa, uli na ning anomalya
deng lamarang manungkulan, gagamit lang impluensya
pondong bilyung mengatabas, n’ya proyektu agad sira.
ahensyang dapat lumawe, lalaban king pamanako
ban libri lang makagalo, lesakan ne ning gobierno
marakal la kasapakat, manibat lalam ‘gang babo
balang metung paran paran, ating dake king porsiento.
congressman ne’t kontratista, deng binotu da reng tau
ni ala mang apapasa, metung batas king kongresu
imbut mu ing magpa-kwalta, ‘la king isip magserbisyu
mapilan lamu nung tulduan, abilang mo deng numeru.
nung itamu manalangin, ala sanang datang bagyu
pag pane pane ing uran, ing kabiayayan maperwisyu
kabaligtaran yang buri, ining dapong pulitiku
mikasanting pang dahilan, palual pera king proyektu.
ngening matutukal na ngan, istrakturang kontra albug
matitibag lang bagya bagya, king sobra sikan ning agus
ala ka mang akit bakal, na keni sana lululsut
nung ating mipalili, malagwa yang ibaluktut.
ing maka-pamulala pa, deng aliwang proyektu
milapag lamu king papil, pero akit mung e la tutu
mengapalwal la deng pondo, king pirayit dokumentu
n’yang miras ing pamag-syasat, sisisyan nung ninu ninu.
kareng kamang sobra lambut, komportableng magpaynawa
lamesang katmung pamangan, putahing ali aliwa
e da takman ing lisangan, maka-aircon atna dimla
malapad a telebisyon, makuswelu da reng mata.
mamili la kareng saken, king puntalan miras agad
ni e da man adanasan, kareng sakeng ating bayad
makasandal masalese, maka-idlip nung mepuyat
samantalang pasahero, madalas pang tatalakad.
patse dinatang ing albug, taung bagya makakimut
mapalad nung alang mate, e bale na nung dumanup
deng ‘lang konsienya’t marine, sakim king pamangurakut
e pansin ing malaliari, lalung kakaniaman tudtud.
balamu mo maragul ya, milabas a PDAP-SCAM
pisabian mu pilang milyon, ngeni bilyong pisamsaman
ngeni ko pin apagwari, bangsa tamu atne yaman
pondong sang e mengabulsa, deng memalen makinabang.
ing pamuntuk meging bulag, e akit ing magaganap
n’yang lulto ing kabulukan, migising ya king paninap
maglarin yang ditak ditak, dapot maragul neng lamat
metung pa’t kagigisanan, atlung banua e pa sapat.
atin kayang miparusan, ila ilang lupang Hudas
agnan agnang lilinisan, deng dinat da kareng gamat
ing matuling maging puti, pamusal dang dakal pilak
uling ing hustisyang ‘ting piring, wangis pau king kakupad.
