payalbug ne ing aldo, ning balen kung komanggi
singap-singap no asang, deng kayang meging lipi,
king tuktuk na ning bunduk, babatyo ining ari
alagad nang mumusig, utos ng e apakli.
latigong mamie late, bala nang magkamali
boses nang naka-tarling, duldul yang atna katni,
takot mu ing mimiral bwelta ka’t e magsilbi,
galameng makakalat magmatyag lang parati.
king lele ng pane sipsip, dati nong e kasangga
ngeni sobrang diditik, wangis lang doble kara,
mamagbayu la kule kalukas deng maskara,
nukarin ating nabang, akwa mung impluensya.
ninu ing ating sala, milukluk ya king trono
itamu ing memalen, gewa tayang idolo
keng mapilan a banua, marakal pamagbayu
kapitang mayna talan, king timung kayang barku.
sana atin pang aldo, king daratang a bukas
e pane ing dalumdum, panga-gising ning abak
uling makasawa na, king lagi nang mangarap
na mitigho ya ing bie, maski na ditak ditak.
memalen kung kayabe, kalupa kung mangutang
atin pa bang pag-asa, ‘bat kareng mamuntukan?
magbayu la king piblas, kaibat na ning halalan
kinalat dang lupi ra, mengari lang ubingan.
balen ku migising ka, ara deng aktibista
anak ku pa daramdaman, atin kayang apala?
dapot ‘lang pamagbayo, gising na’t sabla sabla
mabibie king bangungut, itamu ring ginawa.
