Itong tanggapan ng LTO siguro
Ang pinakabobo at nomiro uno
Sa pagpairal ng ordinansa nito
Na animo’y basta na lang naglalabas
Ng mga ‘rulings’ na sila rin madalas
Ang kaginsa-ginsa binabawi agad
Kapag napagtantong di karapat-dapat.
Tulad halimbawa nitong kailan lamang
Na ipinalabas nilang kautusang
‘No plate, no travel’ na sila rin ang kusang
Sumuspende matapos ang ilang araw.
At kung saan marami ng naperwisyo
Nating motorista sa napakagulo
Nilang patakaran na di rin siguro
Matamang inisip ng Director nito
Bago pa marahil pinairal sukat
Ng kung sinu-sino pang ibang opisyals,
Na ang sasakyan ay di puedeng ilabas
Hangga’t sticker pa nga lang itong hawak
Ng mga buyers ng anumang sasakyan,
Na nasanay na sa dating kalakaran;
At ngayon ay biglang ito’y ipagbawal,
Sino sa tantya n’yo ang may pagkukulang?
Napakatagal na ng dating sistema,
Bakit ngayon lang n’yan naisip kumbaga
Na ipa-iral nang kaura-urada
Ang ‘no plate, no travel’ kung may utak sila?
Bakit hindi itong mga ‘car dealers’ diyan,
Ng Toyota, Honda, Mitsubishi, Nissan
Ford, Kia, Isuzu, Hyundai at iba pang
Klase ng sasakyan ang inyong atasan
Na iparehistro muna ang paninda
Nilang mga kotse’t ibang sasakyan pa
Bago n’yan pupuedeng sa ‘customers’ nila
Ipagbili upang lahat kasado na?
At wala ng dapat pang asikasuhin
Sa LTO itong mga kliyente na rin
Ng mga dealers d’yan ng ‘motorized vehicle’
Upang sila’y wala ng dapat ayusin.
Sa ganyang sistema at/o magkatuwang
Na pamalakad ng ahensyang naturan
At ng ating mga ‘car dealers’ tuluyang
Ang ‘no plate, no travel’ masosolusyonan.
Kasama na riyan ang mga motorsiklo,
Na bago lumabas yata ang rehistro
Ay bumibilang din ng buwan umano,
Kaya pati ‘buyers’ niyan ay apektado
Sa inilabas na utos ng LTO
Na basta na nga lang pina-iral nito
Ng anila’y walang sapat na abiso,
Kaya problema ang idnulot mismo
Ng pinakapalpak sa lahat na ng palpak
Na ordinansa riyang biglang pinatupad
Ng ating LTO na di na nag-‘consult’
Man lang yata sa’ting ibang matataas
Na opisyal natin sa pamahalaan
O sa ‘public hearing’ yan ay idinaan,
Kaya suma-total pawang kapalpakan
Sa bandang huli ang lagi ng hantungan?
(Gaya ng nangyari sa Mamasapano
Na ng pumalpak ang misyon diumano
Ay naghugas kamay ang ating Pangulo
Upang di madawit sa galit ng tao?!)
