Nung mapagumasid ka keng daralanan
Ampon aliwa pang pane lalabasan,
Mekad ining bage kakung apansinan
Arap Kapitolyo, ikit mu na naman.
At yan nanan ku mang sanakan banayad
Pasari ning sobrang kasakitan mekad
King bie ra nung inya ikwa rang arapat
Ding menako karen, iting kakung yulat.
Deting amanwan ku ila ring sikoti
O danggut ning bakud ning Capitol ngeni,
A karaniwan a kakabit dang pilmi
Babo, at nu’bala balas pana iti.
Den alus kapitna mepanako na la
At e na maglambat pati ‘gate’ akwa ra;
Marahil, kilub ning ala mang pabanwa
Pati kabilugan bakud mabating na!
(Panaun nang Among inyang iting bakud,
Magawa ya, inya keng biling yan alus
Anam ya pang banwa at e ya pa matbud
Ban agad masira’t mangalalag lubus)
Posibli mu namang pasari na mekad
Ning shabu nung inya pati na e dapat
Agagawa da ring sugapa na keng ‘drugs’
Ba’lang mikapera king bage e mayap.
E wari kapilan pamu mika-‘meeting’
Ken king Kapitolyo, a nu’ makarikil
King bage iti ing mepisabi karin,
At nu’ pati “junkshop owners” tinagun pin?
At mepikayari king pulung kanita
Itang nung sakali atin lang darala
Ding mamisali ken a kaduda-duda
At e malaut ing iting penako ya;
Lalu’t bayu ya pa at e kalawangnan
Ing kasangkapan a kayang bibitbitan,
Iti e re dapat agad sasaliwan
Ban keta ing bage penako alisyan.
Kalupa ning ngeni kanakung asabi,
A nu’ pelalu ping matilus na pati
Ning bakud a bakal penako da reti,
Yan nung alang sali, e r’ kuanan deti
At e ra paglumon ing bage makanyan
A makaperwisyu maging kaninu man;
Uling kabud meging kusintirul ta’ ngan
King bage e mayap e na mapatpat yan.
At nanung silbi ning nanu mang pisabi
Nung e ra naman pin mattupad iti?
Ing PPO ausan ke pansin kaniti
Ban tutukan na ing bage mepisabi.
At ninu mang ‘junkshop owner’ ing marakap
Mekasaling ‘puslit’ a e sal’wan dapat,
Alang kapilisyan, mikaswan yang agad
‘Anti-fencing’ at e na makapamuklat.
Uling nung kabud na multa ing parusa
Masulit ‘paten’ ing bage malala na,
At nu’ agyang bawal, iti sisigi ra
Uling keng makanyan den manakitan la.
At kaugne niting kakung asambitla,
Ausan kia mu naman ing ken manibala
Karing ‘provincial guard’ o magbante kaya
King Kapitolyo neng tahimik na’ing sabla.
Ing sana e na la kabud makalukluk,
Mipapag-kwentu at pane mu ken kilub,
Nu’ne lumual la at saka pin lumibut
Ban ing ‘capitol ground’ abante reng lubus!
