atulan basi king aske na pabalat,
pero ining kabud da na pepalimbag
ding keng DepEd e yata karapat-dapat
Ipalual ban maging metung a pamasan
ding anak uli ning keng pang pabalat nyan,
malino lalto ing masalang katutwan
ala kang akit a makatud metung man
Karing salita a karelang ginamit,
inya nang’ abalu ding anak a paslit
king iskwela nung yang karela dusuldit
tuturu ra ampon pabasa dusuldit?
At saka nung ken pang pabalat na niti
alang masalese megamit a Sabi
o amanung sukat gamitan da reti,
kilub na nyan pihung mas dakal pa iti.
Inya ngana pin ning anak kung pangane
a metung mu namang tapat talagale
king amanung sisuan, “nung e ya salese
a kalamnan iti dapat da neng yugse
Ban ding anak tamu e na la misane
karing salitang e dapat dang iyapse
uling king dila ra ya ing makamate
king aldo ning bukas ing antiting bage”
Inya nung ninu man dening makigawa,
milimbag kaniti ampon mengasiwa,
Sana neng ing dangal ning manang salita
ing makataya ken… singguni ra pa sa’
Karing institusyun a penibalan na
ning “Provincial Language Council” king Pampanga,
Antimo ing “BUKLUD” saka ing “AGTACA”
ban e mipakanyan ining sinulat da.
At e na la basta kabud na mangangas
luluban ing bage e karapat-dapat
pagobran uling yan ating tagle bayat
ampon e bibirung responsibilidad.
E uling ken pihung ating panakitan
a maragul-dagul agad kong’ sasagpang;
Sana pakibalak yu naman nung misan
ing makataya yung puri at dangalan.
Antimo pin kening pangalimbag niti
a e pakatud ing megamit a Sabi,
Ninung asahan yung kekayu sumabi,
ing asne santing ing sinulat yung ini?
Ing “PAGSASANE” a kekayung ginamit,
imbes “PAMAGSANE” ing dapat magamit,
E ya Kapampangan… inya mangaintulid
kabilang da kayu ring ‘magsasamais’
A e na man biasa pero papalto yu
ing larinu kayu king manang amanu
a sukat gamitan lalu karing libru
ampon aliwa pa a pamasan tamu.
Aintindian mi ing kekong kapagnasan
a palabungan ye ing Amanung Sisuan,
Pero sana naman misan ku pang sabyan
ing bage maselan e yu pakialaman.
Kabang ‘ting panaun dapat tamung kimut
itulid ing sablang bage mibaluktut;
Alilan ya’ing libru…king gabun ikutkut,
Silaban o kaya king ilug ipanyud!
