Malapit na naman ing pamangampanya
O ing panaun ning pamamulitika;
Inya ring tatagal kanyan akit mu la
Lalapit, manatu at susuyu keka.
Panaun na naman nung nu’ ding botanti
Ing ila ring bida karing pusu reti;
At ban makakwa lang simpatya kareti
Pangaku ra pati bage impusibli.
Balang kandidatu akit mong dudurut
Lilibutad pane karing paka-umpuk;
At nung makakit lang anak ampon bingut
Pamanuman da la agyang asno buluk.
Keraklan bistaman e mo kamaganak
Awsan dakang pisan at pangawlan agad;
At nung matwa la ring karelang kayarap
Pane ing siklod da agyang nanung oras.
Ding aliwa akit mo pang makisulu
Karing pamangan da ring pakakalulu;
Apakit da saang agyu rang isubu
Ing nasing NFA at derang a tuyu.
Waman ing tutu na maybug dang isuka,
E ra paulata karing kasulu ra;
Uling ing diskarting yan para karela
Maulagang bage, pamitag simpatya.
Neng ating okasyun akit mong lilibad
Keng dalan, king pali ning aldo magbilad;
Balang salangyan da, dirinan dang alak
A maki-lagyu nung kaninu ya ibat.
Pelalung bisita a karin darataang,
Pibola-bola ra at pakikisabayan;
E da rugu balu lalto lang pikalyan
Kagulut da reti king karin da disan.
Atin pang masulit a bage ikit ku
Nung tegayan daka, sargu la mung sargu;
Lalto lang makulit at asna kagulu
Keng paulit-ulit a karelang kwentu.
At ing makakasnuk ustung ating mete
Atyu la menasa sangkan dang darame;
Dapot ing tutu na… ing karelang pake,
Kampanyan da la mu ding makipaglame.
Ing diskarti ra pang maralas kung akit
Kwanan do ring tau keng patapik-tapik,
At keng galamanung milalu katigik
Kambe ning atin lang king palad pasipit.
Kilalanan ta la sanang masalesese
Balagn kandidatung mengangas mekyabe;
At pakibalwan nung nanu pin ing tune
Parasan da banting iti ibotu te’.
E ta’ manalig king karelang pangaku
A e matutupad, pablasang e tutu;
Lalu na karetang keng balen lalto mu
Neng alalan banting ngara makasuyu.
Antimurin karing sadyang manungkulan
A’yalang matinung gewa king balayan;
Pati na pa karing magmamatudturan,
Maklak, pipi ampon magbanal-banalan.
Ding benggatibu at sira katuliran,
E la naman dapat mipuk king tungkulan;
Uling den nan’ mo man rugung pakisabyan
Mekad mu ika pang marok katataulian.
Ding pisanmetungan a dapat ibotu
Ila ring malugud king balayan tamu;
Malinis, marangal ampon makatau
At makakilala king Diyos a Ginu!
Vhelle V. Garcia
Abu Dhabi, United Arab Emmirates
January 8, 2013
