mibait lalam ning asul nang bubungan
ning pacamalan cu
at igagalang cung Indung lalawigan,
Yan ing caninu man
ipakilala cung mipmung catapatan,
nu’cu man sa’ miras
caring aliwa pang siping tang’ balayan;
Misan man e depat
ing liñgad cung cacung panga-Capampangan,
o picarine cung
ginamit mo’ sa iti caring caumpucan;
Basta’t ala muring
balu cung samut ming e re aintindian,
ya ing pagduglan cung
salitang magamit nu’man sang’ duñgutan.
Potang casabi ke
ninu mang balu cung Capampangan ya’yti,
managalug ya man
Capampangan murin nung atbanan ke’yti;
Tutung ecu’yamyam
pareu ke’ pamong Capampangan niti,
mangapalipit keng
mipagsalita king e na man kecami;
Manawang at lalung
macarine bina itang bandang tauli,
mananagalug cang
maki-samut palang salitang ‘mekeni’
itang amanu mung
isipan mu mecad tagalug pin iti
at e mu uculan
Capampangan pala – matulid a sabi.
Dacal lang macanian
caring cabalen tang’ mipadpad Menila,
a meñgaliñguan na
keti Capampampangan lubus migpabusta;
E ta’no damdaman
king Capampangan la mipapagsalita,
nune king Tagalug
at king ‘English’ mu no’ damdaman menasa;
Macapagmulalang
e no’ canu biasang Capampangan ata
samantalang deti
Capampangan no’ mang balu tang’ mistula;
Mayap la pa misan
ding talagang meluat king aliwang bansa,
potang cauli ra,
larinu la’t e la garil magsalita.
Inia mal cung Indung
cacung Lalawigan e mu calulungcut
nung atin mang linto
alang masabal king pamibuclud-buclud.
Dacal ke’ pamuring
macatagan ngening tapat makipamuc,
at misasanmetung
king kekeng Aguman ban tumibe lubus;
Kambe ding aliwang
masuyung anac mung king tungculan mipuc,
misaup-saup keng’
yañgat pa king sadia ing kecang bantayug,
ban keta lalu pang
iting Salita mu ya ing mitaluctuc;
King danggut ming pluma
Capilanman e na malumpawi’t lumbug.
At canita Indu
nung guniat la’t kimut ding sablang anac mu
ban palabuñgam pang
migit pa king sadia iting Salita mu,
acu, king agia mang
dimut mu mecad ing tagle cagiwan cu,
gampanan cu namang
anti ring aliwa ing maging dake cu;
Mupin e cu balu
nung apagdamut mo’ ring kawatasan cu,
uling ilang bucud
keca cu ayampang king capanayan mu;
Ala cung pibandian
a maliaring keca ngeni isuyu cu,
Indu nune rening
ginulis ning plumang cacu pamana mu!
