Balen ko, misan pang kakung ilarawan
Ing napun king bie mung mipmung kasakitan,
Lalam dang upaya ding mapanalipan
A keka migtangas ba’ ra kang sakupan;
Sablang pibandian mu ganap dang sekiman
King pemanyapat dang kalapastanganan!
Kulung – karing balang karela salangsang,
Kamatayan – para king keka lumaban!
Kanitang e la pa king Pulu sinanglad
Detang kang Felipe’ng sakim a pamalak,
Keting Indung Balen a nung nu’ laganap
Ing katahimikan king Parang mung maslag;
Tiwase la keta’t maligayang ganap
Ding anak nang Eba a’yalang pagsalbat,
Kabang ding kang Adan… atilu king dayat
Payapang manasik king bie rang panatag.
Dapot ing kalayan ning balen ta’ng irug,
Simsam ding Kastilang matuling a buyut,
Kapamilatan na ning segisag dang Krus,
Ikua reng abihag… asilung malambut!
Kaybat, ditak-ditak, sikmal da nang lubus
Ing eganaganang bindian da na kabud;
Angga na king deti ila nang sinakup
At ganap mig-Ari…linto alang tarus!
I Tarik Soliman na ning Macabebe
King panlub da reti e ya pepaybande,
At keta teya na itang solu nang bie
Ban e la milub ding e mayap a pake;
At uling balu nang yan kelan marine,
E ya pepaysupil king bangis dang tagle;
Angga na king iti aku reng apate,
King parang ning digma a nu’ya mipase!
Itang Lapu-lapu… king isla ning Mactan
King panlub da reti meyakit ya tapang;
Uling e’na tanggap ing maging alipan
E’ya peparaig… pete ne’y Magellan;
Nung e mu ing Misa a gewa rang tangnan,
A keti dela rang antimong panapan,
I Sikatuna keng tagle nang bengisan,
E’ la misaka ren karing mal tang pampang!
Uling ning tepangan ding liping Komanggi
Dakal lang anak mu a meging bayani;
Pablasang ding biasa, tutung e ro buri
Uling ukulan dang e ra la apakli;
Pemanyakap dala, pemate piragli!
I Gat Jose Rizal at ding atlung Pari,
Inyang mabite la… milablab ing Api!
I Andres Bonifacio ya nang menimuna
Karing Katipunan king panga-tatag na;
Ding sablang memalen a e’na mibata,
Ginisi ra no’ ngan detang Cedula ra!
Kaybat… Balintawak – karin gilisak da
Ing pamakipamuk laban king Espanya!
“Luid ya ing Balayan!”, nganing kukulyo ra,
“Ing mate e bala, lalam mung Bandera!!!”
Detang NOLI’t FILI mitsa lang mistula
Ketang himagsikan a karin migmula;
Ing kasangilan da sakim a Kastila
‘Nyang nobenta’y sais mebinyag king daya;
King painut-inut … kanita na mekwa
At ganap mebawi ing simsam dang Laya;
King pamisuge rang tepangan at diwa,
Ding meging anak mung Bayani ning Digma!
Kaibat, i Aguinaldo karin ne bintiwas
King Kawit, Cavite ing mal ta’ng Watawat;
Tanda king iti yang aldo nang panaslag
Ning Katimawan king bansang Pilipinas;
Hilario, Maniago, Makabulos’ – Tarlac,
Hizon at Dayrit ning beitan tang labuad,
Upayang Kastila ikua rang asaldak!
Lubus ta’na sanang kumit Katimawan
King tagumpe tamu laban karing daywan,
Dapot ating Dewey a biglang dinatang
Sasyo ta’ng Kalayan, yang keta sinamsam!
Sekupan ne’ing balen uli ning sikanan
Ning Agilang ibat king dane Albugan;
At keta ing Bansa miuman deng telanan
Ding e ta’ kalahing maputi mu naman.
Tutu inampang da itang Demokrasya
Dapot ila mu ring kekata dirikta;
At waman king Balen linto no’ kanita
Ding anti ri Osias, Quezon at Osmeña,
Roxas, Abad Santos ampon aliwa pa;
A sukat talan king sarili ta’ng renda,
King pamipalakad king balen a sinta,
Atyu kagulutan ing Tusong Agila!
At uli ning atin lang apikasundu
King ing katimawan ibie ra nang tutu,
Pauli nang Quezon… ding mesabing Kanu
Tiparan da ren ing karelang pengaku;
Nung ing mag-sarili ganap ta’nang agyu,
Ibie ra na reti king mal tamung Indu;
Dapot itang aldo inyang sunlag niamu,
Ing pang-Adwang Gyera biglang mikaluku!
Karing pampang tamu bigla na’ lang linsut
Ding lalu pang lasip ampon makatakut;
At nung ding Kastila a keti sinakup,
Kanita la linto lang ganid ampon marus,
Deting tauling dintang a keti linusub,
Puri’t dangalan ta’ dekurak dang lubus;
Pilan lang memalen ding mete, metampus
A solung bie para king balen tang irug?
Salamat, kaybat ning atlung banuang singkad
Ing puersa ding Sakang ikua rang asaldak,
Ding msanib-sanib a puersang milangkap
Ning Agilang meko…at ding kekang anak;
Ing pengakung niting magbalik at sukat,
Ya ing mepalyari king bansa migligtas;
Itang Yamashita a keti miglagpak,
Bite ing parusa a keya ra sildak?!
Kalabas ning asuk ning mapaling gyera,
Inampang neng miuman bansang Amerika,
Ing ganap at lubus a kalayan keka,
Kapamilatan ning beba ne ing Keya
At ing Kekatamu yanang pepaitas da,
Layun memayagpag king asul a banua;
Tanda king ing Bansang Perla ning Malasya,
Kalag ne gapus king panga-alipan na!
At ngening Malaya neng ganap ing Bansa
Itamung anak na mikalugud ta’ sa;
Misanmetung tamu king pusu at diwa
King nanu mang bage keyang kasaplala;
At keta, sakali’t atin pang aliwa
King aldo ning bukas miuman pang magnasa,
Pasibayu, itang miagum ban mamingua,
King kekatang Balen at Mal tang’ Bandila!
