Pero ngeni pamu dakal nong’ sasamal
Karing mangatikdi tamung manungkulan
Ban keng 2016 pasibayung tagal.
Y Alan Cayetano metung ne kareti
A ngeni pane tang’ akakit keng TV,
King kayang ngaku pin pasimpling ‘ads’ niti
Umpisa neng abak angga na king bengi.
Agyang y Trillanes sasamal nia naman
Agpang keng malino akakit ding dakal,
Tabalu mu pin nung yan e re kabilang
Ding mengapaunang kabud mu madaldal.
Ampon aliwa pa a magmayap-mayap
At nu’ anti galing keng pamagparagas,
Pero angga mu king puru la mung satsat
At ala mu namang masanting a depat.
Obat ela pa mu pin kaya magobra
At arapan pamu ing katungkulan da
Bayu ilatlat ing pamamulitika
A sobra karanun ban makatipid la?
Keng nung nanu-nanung klasing patalastas
A nu’la gagastus kualtang limpak-limpak,
Inya kalukluk da pamanyingil agad
King kaban ning balen ing karelang agap.
E ku buring sabyan pihung manako la
King balang mibawi karing ginastus da,
Pero ayasahan ta’ kaya karela
Ing matapat deting serbisyo king masa?
Partikular no’ ken ding bisang lumiwas
Lukluk o talan king puestung pekamatas,
A nu’ mapalyaring e la atlu, apat
Ding milutlutan ken panyatang ning oras.
Karing kapartido nang PNoy, bista man
Maragul ne keyna at e na popular
Y Mr. Palengke, ya mekad malamang
Ing posibleng iretu ning Malakanyang
Tabalu mu pin nung y Mayor Duterte
Ning Davao tagal ya bilang Presidente
(A nu’ dakal la ring iti mas buri re
Uli keng gelingan tais at subuk ne)
Y Binay bista man mibaba ya ‘ratings,’
(Uli ning mialiwang isyung e masanting
A kaya apilit dang babarongga pa pin),
Ya, apipihu tang’ tagal ya pa murin.
Y Miriam Santiago kabilang ya naman
Karing mapalyaring sumabak keng laban
Kabud mesikan ya pamikakatawan
Agpang keng amanung pisyag na nyang misan.
Y Senador Bongbong Marcos e malaut
Yang isabak da ring kakampi nang lubus,
A nung nu’ maragul ing keyang panyambut
Uling yang manuk da king parteng Ilokos?
Tabalu mu kareng pamilyang Aquino
Nung atin pang tagal keng datang a Mayo
Ngening nung wari keng maglayag a barko
Mityab ya’ing sekyan ning anak a Benigno.
Inya ninu man den a ngeni gagagad
E tana mu kabud mamalal at sukat,
Nu’ne pakasuryan tala pamung mayap
Ban e’ta sumisi king aldo ning bukas!
