I
Magsalbat ya ing pusu ku king e tutung kapalsintan
ning babai a mengakung sintang alang kamatayan
mebating yang anting bula kabud na naku gilutan
e na dininan ulaga ing kekaming pisumpanan
II
E ku balu, nung ing lugud a sasabia’nang dalise
deyu na ne para kaku at king aliwa ne binie
Inia ngeni ing pusu ku tatangis yang mipnung lumbe
king megipung kapalsintang, melumud king tagulele
III
Ita palang aligan ku king binili nang pangaku
makabalut kalaraman mitalbug mu ketang gintu
pinaid namu ning angin dela na ketang marayu
e ne datang, agiang nanan ku man a magparalumpu
IV
Kapalsintan, akabas me, misan king maputing biga
ing alkus na, king mapilan mung penandit manaliwa
ating datang a panaun magkule yang paldas bigla
ban isaldak na king gabun ing anggang atipu’nang lua
V
Nung mengari ya mu sana king aldo ing kapalsintan
lumbug ya man ustung bengi sunlag ya rin kabukasan
e anti king pilsintan kung meko alang kapamunan
nung magbalik ya pa kaku e ku balu nung kapilan
VI
Dapot panenayan ke pa pota nung nu ya linuyun
mekad iti mibalik ya king daratang a panaun
kasebian, ing ayup kanu a king sinta na migmalun
magbalik yang pasibayu karas na ning gatpanapun
