1.
Neng ding macyasawa anac mong babai’
king lugmang masapsap maybug cang marindi’
e ca mipatudtud sira ca discarti’
at e na atanggap ning kecang sarili’
2.
Ninung e mangilkil at maybug maluse
ustung ing anac mu keca samsaman ne
ning anac ng Adang pilsintan nang tune
a cayang apiling acalucup king bie
3.
Pigaganacan mu king balang penandit
nung ing kecang anac e ya magcasakit
maki-utus caring cayang acasulit
a e mu sanac pa panugali’t isip
4.
O nung mitud ya pa caretang simarun
mecad ing utac mu e mipaindatun
Pota bagyang cabit tambing yang sisirul
ing lalaki ken mung simpli rang discusyun
5.
At nung mitagun pa a cusintirul la
ding meging catwangan ning anac mu sinta
liyus king samasan na sa ing prublema
itang simpling silab palablaban da pa
6.
Binang macatacut nung kecang isipan
ing clasi na ning bieng sucat rang danasan
mibata la caya ketang casakitan?
nung sacaling dimut magi rang cabyayan
7.
Lacuas na nung deti asanayan da na
anggang panusig a binie mu carela
uli na ning lugud e mo apibata
nu man cabayat ing lalambis da keca
8.
Agiang e ra balu pane cang mangadi
a mayap yang tau’ing carelang apili
anti mong pengari pabustan ta wari?
a ing pigampa ra king kabiguan muli
9
Macanian cabayat kecatang cabilian
bilang pengari ring anac tang liguran
e baling itamu ing mangasakitan
e mu sa ring supling tamung pacamalan
