Nukarin miraras masanting a pale
a pupul ding anak-pawas king marangle?
At potang abias na nukarin da pane
Sasalikut iti ding alang marine?
Pruduksiyun ning pale keti kekatamu
sobra-sobra iti para keti mismu;
Dapot king aliwang bansa sasabornu
a pisasali ren king matas a presyu.
At kaibat, ing abias a keti midala
meum a menibat king pikukuanan da,
Kalupa ning Vietnam, Thailand at Malaysia
a papakan da mung asu king karela.
Ding pakakalulu pagtiyagan dang tutun
itang murang abias a babaung meum,
Inya agyang mulam keng metung a litsun
ing nasi emu pin maybug mang ayakmul.
Mapilan nala mu ding ating upayang
makapangan ketang abias a manyaman;
Alus deta namung mayap manakitan
at ding ortelanung e mikutkut utang.
Panaun ng Cory, Tabaku at Erap
atatandanan ku mura pa ing abias;
Katorsi pesus ya itang pekamatas
dapot manyaman at tune de kalidad
At inyang lukluk ne ining Madam Gloria
midobli ne presyu ing abias kanita;
Inya mipakanian, mika-anomalya
mebuluk ing abias karetang bodega
Marahil pauli na pin ning milyari
mekisabwatan la karing negosyanti;
Ding makipasari ketang insidenti
king ban abawi da itang pangalugi
At kaibat na nita ninu ing mamusan
ketang agawa dang laksang kapalpakan?
Itamung memalen ing pane daralan
king tamak a barug na ning kasakitan
Bakit aliwa ken ing gubyernu tamu?
ing sali king pupul da ring ortelanu?
ban keta e binang mitatas masyadu
ing presyu ning abias karetang merkadu.
Ing pupul king bansa e na dapat ilwal
o ikalakal pa king aliwang lugal;
Uling daragul na ing pamangailangan
ning yatu kaniting mesabing pamangan.
Nung kalupa sana kanitang minuna
dakal pa ing tanam a pale king lawta,
Pangumersiyu ta’ man e binang problema
uli na ning pupul tamung sobra-sobra.
Pero uling ngeni dakal na ing gabun
a mengapisali minurung ing pupul;
asikan a sadyang pane magagambul
ngeni pabrika la ding ken kumpul-kumpul.
At datang ing aldo bina nang masulit
pamanyaling abias lunto nang masakit;
Makasali ka man marahil kapurit
at king presyu niti maybug kang mamurit.
Inya ngeni pamu misip tang’ banayad
ban e ta’ sumisi karas na ning bukas;
Pakamalan tamu ing gabun king dayat,
ing pale at deting uring anak-pawas.
Vhelle V. Garcia
May 28, 2012
Abu Dhabi, United Arab Emirates
