METUNG ne naman ken karing talagambul
King Amanung Sisuan at Sabing keragul,
Ing wayta payapa neng king yatu memun
Ing nomiru uno tamung pulosador.
A e mu keti king mal tang lalawigan
Pekatanyag ampon kikilalanan dang
Ari keng pulosa’t kantang Capampangan
Nu’ne angga na keng aliwa pang lugal.
At mekilala keng lagyung ‘Totoy Bato’
Ing keti Pampanga mapuring idolu
Ding dalaga, matua’t anak, baintau;\
Lalu ring mapad keng poesya’t basultu.
Partikular karing atyu ken ‘Middle East’
Nung nu’ ding ‘voice tape’ nang pakalako inip
Ila ring menasa panlaban dang ‘homesick’
Potang paynawa la’t magpatigtig ‘cassette’.
At nyang katanyagan na pa ning Zarzuela
Keti king Pampanga, at ken Mauli na
Ning Tarlac, aku ing madalas kanita,
Kakua keya bilang pamuklat eksena.
Ikami ring ken king barangay Telacsan
‘Compaña Trinidad, kasikat-sikatan
Ning Zarzuela, akung Apuntador bilang
At i Totoy Bato, Pulusador neman.
Ya ing keng ‘Jamboree’ a peka- ‘lead singer’
Bayu ing Zarzuela mipalage ya ken
Karing insanu mang Pistang Baryu’t Balen,
A nu’ ke kayabe king mesabing pialben.
I Bato dakal ya kantang Capampangan
Inta nung nu’ya man miras, e kapaltan
Pyesa a malyari na ping ikanta n’yan,
Lalu’t kademyadu ne ing manigtigan.
Ing kantang ‘Pamilyang Kuriput’ ya peka
Sikat dili karing kapad niting kanta,
At ken kapilan man, kepaltan ali ya
Karing pibuburyan ding manalbe kaya.
Tauling akayabe ke i Totoy Bato,
Nyang king Pamantasa ning Holy atiyu
i Mayor Pamintuan at ding nobleng tau
ken Angeles banting ing idolu tamu,
Dinan deng masampat a oras o ‘tribute’
I Rodolfo Laxamana o ing bantug
A Totoy Bato ning balayan tang irug,
Ken king Holy Angel, lagyu na e lumbug.
At e matda kabang ating Capampangan
A migagale at mapad makiramdam
Karing pulosa a bungang kaisipan
Ding poeta’t taladalit ning balayan!
Nung nu’y Totoy Bato, angga na king iti
Mete ya… e mitda lablab ing sulugi
A mipnung ingat nang binten aldo’t bengi
Kapamilatan ning dedikasyon niti.
A nu’ migsilbi ya antimong pekapun
Ding aliwa tamu pang ken Pulusador,
At ngeni aplit pang lilinang, gagambul
Ban ing Sabing menan miuman yang lumabung!
