Y QUERUBIN D. Fernandez: Ninu at nanu ing keyang
Meging papil king labuad na ning mal tamung lalawigan?
Iti, e mu pin bukud king poeta yang matenakan
Ampon mekilala bilang watas pang-internasyunal,
Y Querubin ketang bie na meging metung yamu naman
Keti balen Mabalacat migsilbi king kapamalan;
At yang king IMNO ning balen – sinulat, anting kasuywan
Bilang anak na ning ngeni siyudad tamung tatangalan.
Y Querubin D. Fernandez – king larangan ning panyulat
A nu’ mekikila iti agyang king aliwang labuad,
Bilang poeta laureadu at meging kawal nang tapat
Ning ‘United Poets Laureate’, Amerika na belangkas
Poeta Amado Yuzon, a Kabalen tang’ matapat
At e mu king lalawigan tamu mekilalang ganap
Keng gelingan mamikudtang kawatasan a masampat,
Y Querubin, inabe ne karing poetang mangayap.
E mu keti Pilipinas… nu’ne mabilug a yatu,
Pablasang ing kapatad tang’ ngeni ume nang painturu
King karinan ning Miglalang, dangal ne ning balen tamu
Karing meging ambag niti king kultura at amanu,
A sukat tang’ pagmairing ampon pagmaragul ustu
Karing kenu pa mang lipi mabilug a unibersu;
Sana metung mu man karing suli ning kapatad tamu,
Keya ating magmana ban sumiasat ampon sikasu;
Karing gintung kawatasan a belangkas na ning tata
At ya antimurin ing misundu at malangkas pa
A mialiwang adle na ning arte tamu at kultura,
Ban king aldo na ning bukas pasibayung mitindag ya
Ing salitang Kapampangan keting mal tamung probinsya,
King kapamilatan ding anak a sukat magmana;
At kanita la pa mekad pasibayung maniampaga
Ding tenam nang kawatasan niting mapuring tata ra.
O kapatad a Querubin, ngening ume neng painturu
Ban dulung ne king aun ing alabuk a katawan mu,
Kagulut mu, atin kaya karing anak a lakuan mu
A mika lub king panyulat kaniang sisuan tang’ amanu?
Sana agyang metung mu man ating lunto kalili mu,
A kekaming akayabe ibat karing pamilya mu
Ban ing sabi tamung mana lumabung yang pasibayu
King pamisuge rang mayap ding tutuking lipi tamu.
Karing kekang akayabe meging kawal ning panyulat,
E na matda kapilan man ing lagyung mung sari tindag,
Ing ika metung karing meging matibe nang asyas
Ning kulturang gimbulan mung alang sawang pepalablab;
Kasulatan a likuan mung king kultura meging ambag,
Ilang maging inspirasyun deting bayung talasulat;
At nung ipagkalam ning Dios – kaligaya mupin mekad
Nung karing lakuan mu ngeni, ating magmanang sumulat!
Ngening ume na kang mako… e na miuman magbalik pa
Siping dening kapatad mu, anak mu ampon asawa,
Ikeng meging kayabe mu ala keng ayampang keka
Nu’ne paldas a parangal a keka mi ngeni sidya;
Ati’ke ngeni siping mu, makirame keti minta
Ban king tauli mung penandit…Koyang Robin akit daka;
Yaduan mi king Mayupaya – mipagkalam sana keka
Itang alananggang tula, sidya ning Dios para keka!
Marvel ‘Vhelle’ V. Garcia
Poeta ning San Simon
Pampanga
