KUNG ganyang kung alin ang dalawang sangay
ng ating hustisya, (itong Kagawaran
ng Katarungan at ang ‘Highest Tribunal’)
ang tila may bahid ng pagka-immoral;
Gaya ni dating DOJ Sec Aguirre
na pinagbitiw ni Pangulong Duterte
dahil sa isyu ng pagbasura pati
ng Piskalya sa kaso ng ‘celebrity’
Na si Kerwin Espinosa, kamakailan
na umaming sangkot sa gawang iligal,
pero naabsuwelto, at naging dahilan
ng pagbitiw ni Sec sa puesto niyang tangan.
At ito namang si Chief Justice Sereno,
na may ‘cloud of doubt’ ang kanyang pagkapuesto
sa ‘Supreme Court,’ saan na kaya patungo
ang ‘justice system’ sa isang tulad nito?
Kung ganyang umano kahit may nilabag
na ‘rule of court’ mismo sa Saligang Batas
ang atin pa manding pinaka-mataas
na hukom ng bansa ang hindi matinag?
At kapit-tuko sa kinauupuhan
sa kabila nga ng itong Malakanyang
ang nagpapababa sa tungkuling tangan,
na bigay ng kanyang Pangulong sinundan?
O ‘yan ba’y nang dahil sa itong nagluklok
kay Sereno ang siyang matibay na moog
mismo nito (PNoy) sakali’t umabot
sa puntong siya ay sa Munti mapasok?
Kaya nga’t malinaw mang may nilabag na
mga panuntunan itong kwenta ‘Reyna’
sa ‘ting pinakamataas na tribuna,
‘yan ay di mabaklas sa upuan niya.
Ano bagang silbi nitong ‘quo warranto’
na sandigan minsan sa ating husgado
para magamit sa legal na proseso
kung di rin lang pala maipatupad ito?
Ipagpalagay nang hindi ‘co-terminus’
ang ‘chief justice’ sa kung sino ang nagluklok
(na Pangulo), pero itong nakaluklok
‘at present has no hand to push Sereno out?’
Kung kagaya nga r’yan na tila may ‘lapses’
ang ‘chief justice’ sa di nito pagsa-’submit’
ng SALN at iba pang mga papeles,
bago ang opisyal nitong ‘oath of office’.
At kung ganito ring ang ilang kasama
ni Sereno mismo sa hudikatura,
di rin niya kasundo – ano’t di pa siya
kusang bumaba sa kinalalagyan niya?
(Maliban na nga lang sa hinala natin,
na kaya di nito magawang magbitiw
ay dahil na rin sa posibleng gamitin
siya ni ‘tulo laway’ sa kanyang usapin
Na anumang oras posibleng isampa
ng ‘blue ribbon committee’ o kamara,
ang kaso ng SAF 44 at saka
itong hinggil sa lintik na ‘Dengvaxia’.
Kung saan kabilang sina Janette Garin
at Florencio Abad sa mga maaring
makasuhan sa pag-bili ng nasabing
bakunang ang dulot sa lahat ay lagim!)
