Araw ng Lunes nang ibalita nitong
Ating kagawaran d’yan ng Agriculture
Na tayo’y nag-export sa bansang Singapore
Ng puting bigas na 45 metric tons
Kung saan mataas na uri ng bigas
Itong sinasabing ineksport ng Pinas,
Imbes dati tayo ang siyang umaangkat
Sa loob ng ilang taong nakalipas
At sa mga susunod na buwang darating
Ay 20 metric tons ang napabalita ring
Sa United States naman yan dadalhin
Base sa news reports na nakalap natin
Na inaasahang humigit-kumulang
Ay aabutin ng halos isang daang
Metriko tonelada sa kabuoan
Ang napabalitang eksportasyon na yan
Nagsimula nitong nakaraang Mayo
Ang ating pageksport ng butil na ito
Matapos ang mahigit sa kuwarenta año,
Na tayo ang siyang umaangkat nito.
Mula sa tayo ang siyang umaangkat,
Tayo ngayon itong ‘exporter’ at sukat;
Pagpapatunay lang na sadyang may sapat
Na suplay ng bigas itong Pilipinas.
Pero ang masaklap sa puntong naturan
Ay tayo ang siyang kapos kadalasan
At walang mabili sa magbibigas diyan
Kundi ng ‘re-milled’ na NFA kung minsan
At tayo na siyang dapat makatikim
Ng sariling ani’t masarap na kanin,
Itong kumbaga ang walang maisaing
Na 1st class na bigas kundi ng amagin
Na nire-mill nga lang nitong mga tuso
At mapanilinlang na may-ari ng kono
Na kasabwat minsan ng mga ‘dorobo’
Nating opisyales sa ating gobyerno!
Na ugat at lahat ng pananamantala
Kung kaya malimit sumisirit bigla
Ang presyo ng bigas at tayo ang wala
Ng mabili kundi ang lasang pinawa.
Gayong katulad nga ng ating tinuran
Ay tayo ang siyang pinanggagalingan
Ng magandang klase kumpara saan mang
Karatig bansa na posibleng pagkunan.
Katulad niyan, kapag nagkasunod-sunod
Itong sa ibang bansa natin ine-‘export’
Ang ganyan karami na ilang metrikos
Na tonelada n’yan – pero pagkatapos…
Ay tataas naman ang presyo ng bigas
At tayo ang walang mabili kaagad?
At kung saan itong mga mahihirap
Na masang Pinoy ang mamatay ng dilat?
Sanhi ng di na n’yan makuhang abutin
Ang presyo ng kahit bigas na amagin
Pero sumusunod sa halaga pa rin
Ng bigas komersyal na na may halo na rin
Kaya sa puntong yan kung alin ang bansa
Na maituturing na sadyang sagana,
Sa nasabing butil ang nakatunganga
Oras na tayo ang kapusin ng bigla?
At ang masakit ay tayo na nagbenta
Ng bigas sa ‘abroad’ ay siya kumbaga
Itong sa merkado ay walang makuha
Na murang bigas at medyo sariwa pa!
