sa katiwalian ng airport sa Pinas?
Di ba ang BOC dati’y nagpahayag
na ang bagahe ay marikisa dapat?
Nang di mapagbigyan sa kanilang hangad
huling hirit nila ay patawan ng tax
Ang mga papasok na mga bagahe
na pinadadala ng mga migrante;
Halatang nais lang namang dumiskarte
nitong mga taong napaka-salbahe
sapagkat ultimong sardinas at kape
papatawan ng tax, aba naman grabe!
Dahil sa batikos na inani nila
sa mga migrante at sa social media
sila’y nanahimik, ngunit kapagdaka
may bitag na pala silang iniamba;
Sa palagay ninyo hindi kaya sila
ang may pakana sa, laglag/tanim bala?
Sapagkat kung ating pakalilimiin
sa OFW ay gigil na gigil
ang taga BOC at yan ay marahil
hindi napagbigyan sa kanilang hiling;
At dahil sila nga ay galit sa atin
nabuo ang isang balak na maitim.
Kahit na sino pa’ng may sayad ang utak
di maglalagay ng bala sa kanyang bag;
Ang tao pa kayang ang muni ay ganap
itong sa sarili ang magpapahamak?
Magdadala ba ng bala sa kanyang bag
Ang sinumang wala ring bitbit na armas?
Sa ganang amin ay taga airport mismo
ang nasa lingkod ng pangyayaring ito,
na serye ng ‘scam’ na biglang lumobo;
At ngayon lang naman din nagkaganito,
na nahulian ang ilang pasahero
ng bala sa bitbit nilang kargamento.
Maliwanag pa nga sa sikat ng araw
na ang insidenteng yan sa paliparan:
Ayon sa salita ng isang opisyal
ay di problema ng gobyerno ang ganyan;
Kapal pa ng mukhang ipangalandakan,
OFW VOTES hindi niya kailangan?
Mga kababayan, kung kayo’y aalis
doon sa NAIA ay maging matinik
huwag hahayaang, mayrong makalapit
baka mataniman ang bag ninyong bitbit;
Para siguradong walang maisingit,
ang mga abubot balutan ng plastic.
Huag magtitiwala kahit na kanino
kung hindi kilala ay iwasan ninyo,
Kahit sabihin pang sila’y empleyado
ng airport sapagkat lubhang peligroso;
Ang NAIA ngayo’y mistulang impiyerno
dahil nagkalat ang maraming demonyo!
Kahiya-hiya na itong ating bayan
sa pinag-gagawa ng lintang kalabaw,
Na kahit sa anong klase ng paraan
ang nagkakapera ang mga damongkal;
Ngayon lang kung saan ang ‘Tuwid na Daan,’
ang ‘slogan’ ni Sir nangyari ang ganyan.
Eh bakit nga hindi? Kasi di makayang
Pastulin ni PNoy ang iba niyang kawan;
Dala na rin nitong puro salita lang,
Pati alipores n’yan sa Malakanyang;
Sana bago sila bumabang tuluyan,
Magpakita yan ng pagbabagong tunay.
