GAYA NI Sharon Cuneta, masaya si Ogie Alcasid na makatrabaho si Wilma Galvante sa bagong home network, ang TV5.
“Masarap” ang description ng co-host ni Mega sa The Mega and the Songwriter, ang bagong musical variety show na magsisimulang mapanood sa Kapatid channel sa Linggo, 9 p.m., sa muling pakikipagtrabaho sa dating GMA-7 boss.
Matatandaang dating magkasama sina Ogie at Wilma sa GMA-7 bago parehong lumipat ng TV5.
“Masarap, kasi unang-una, ninang ko ’yan. Hindi naman nawawala ang pagiging istrikta niya, although we have a lot of artistic freedom,” sey ni Ogie nang humarap kahapon sa isang intimate interview para sa TV5 shows na The Mega and the Songwriter at Tropa Mo Ko Unli, na mapapanood naman simula sa Sabado, 7 p.m.
Bukod sa feeling na may direksyon na ang kanilang ginagawa, tutok pa ito sa mga programa. “Hindi ko masisisi si Sharon and you can quote me… gusto ko si Ma’am Wilma,” dagdag pa niya.
Ikinatutuwa rin ng mister ni Regine Velasquez na muling makasama ang dati ring Kapuso na si Wendell Ramos.
Mainstays noon ang dalawa ng top-rating gag show, Bubble Gang, ng Siyete. Pero ngayon, magkasama sila sa Tropa Mo Ko Unli, kung saan ii-impersonate ng komedyante ang Eat Bulaga child wonder na si Ryzza Mae Dizon.
“Nu’ng magkita nga kami ni Wendell, niyakap niya ’ko. Sabi niya, matagal na akong malungkot dito,” tsika ni Ogie sabay tawa. Bukod sa dalawang shows, may executive position din ang singer-comedian sa Singko.
Siya kasi ang tatayong unit head ng music department ng Kapatid network. “More of consultative, ’di naman talaga ako employed. But since I’m a head of a business unit, boss ka nga, but they can call on me anytime,” aniya.
Anumang usapin tungkol sa music content, sakop ni Ogie, gaya ng theme songs ng mga teleserye, atbp.
