KABALEN, e kaya rening sasalangsang
Keng kandidatura nang Bongbong, e mulang
Ining nung kapilan ya ngeni tatagal
Bilang presidente karin la kakangkang?
At ngara atin yang kasong ‘tax evasion’
Inya king nanu mang ‘government position’
Yan ali ne kanu pin kwalipikadong
Sumoso king nanu mang uring eleksyon?
Diskwalipikado ne pala’y BBM
Ngaring keya magpa- ‘disqualify’ pin ken,
Obat kanita pa e ra aisip den
Ing sabatan de’yti ba reng apalelen?
At penaya ra pang meging Senador ya
I Bongbong Marcos at kaybat na pin nita
Tinagal yang Bise Presidente, e ra
Sigka ring diablus ing kandidatura na?
(Nung nu’ ing taung yan ing sinambut dapat
Nung e ria pirait dening mapanekas
A dilawan agpang king malino ulat
Ikit da’t mesuri namang miamasamas.
At apalto ra man pin di Attorney Chong,
Gadon ampo pa ring ‘supporters’ nang Bongbong,
King yaing ‘winner’ king mesabing eleksyon,
Ing Comelec e ya agad migdesisyon).
‘Moot and academic’ na keng biling iti
Ing protesta, inya nanu pa ing silbi
Ning managalan ya ing pirait deti
Ngening mag-alalan na naman pin keti?
At ngeni re rugu sasagkan ban tagal
I BBM dening e ta’ balung sabyan
Nung maturak-turak la ren o abnormal
Kening panyaptan dang ala na keng lugal.
At ngening ikit dang keng ‘survey’ i Bongbong
Ya ing mangibabo at garantisadong
Sumambut ya iti keng ‘May 9 election,’
Pa-‘disqualify’ re keng mababo rason?
Pasari namu ning buri ding taung den
Ila pa murin ding king Timun ning balen
Mumugit at nu’ pin pangsarili mu ken
Ing balu rang gawan ding keraklan karen.
Mamarokan ta’la ring pamilyang Marcos
King isyung i Apo Lakay ing pagulut
Karing perang balen ya ing mengurakot,
Yan kabaligtaran ning meyakit lubus.
Inya nung keni mung ngara ‘tax evasion’
Karin de ngeni ren atakyan i Bongbong
Ban i- ‘disqualify’ pilan lang Senador
At ‘Congressmen’ ding ken yabe keng ‘suspension’?
Ukulan da kaya rening magbibiasa
A pakansela re ining C.O.C. na
Nining ‘subject tamu, iti e ibunga
Na ning e mabilang a kontra protesta?
At nu’ ing malyari na niting kaulyan
Maragul a gulu ing matdas, nung e man
‘Peoples power’ ing ken mangibabo miuman
‘REVGOV’ ning ‘Ega-Fed’ ing isulung ta’ngan.
Iti ing senaryo ning ken e malaut
Malyari, nung ining C.O.C. nang Marcos
i- etse puwera de ren king ba’yang sumambut
ing ninu mang Smartmatic ing mag-manuk!
