BISTAMAN beinte-otso na pa ning Oktubre,
Merapat ing ‘local election’ a tauli,
Ngeni pa atin nang king bage mesabi
Babalak tagal keng banuang dos mil kinse?.
Lalu na karing keng pulitika mapad
At bagiang kabit ken makigagad-gagad,
Pasari namu ning deti e no’ mekad
King bage iti’nan mimisip banayad
Nung nanu ita’ning sukat nang gampanan
Ning metung a taung mipuk king tungkulan?
Uling ukulan da mekad ding keraklan,
King ing bage iti kabud mu makanian?
At deti ala lang obligasyon moral
Antimong ngara pin ‘elected official?’
Ngening king milabas deting pamanagal
Ikua rang miyabe karing mengayalal?
Antimurin naman karing e misuerti
A menagumpe nyang alalan a tauli,
Sakali ikayung mikalma kaniti
Nanu mo kaya ing kekayung asabi?
A makaparikil king mesabing paksa
Nung e maging sala at e yu ikamua
Ining king bage yan anti waring serya
A kakung bibilad arapan ding malda.
At balamu anti ku mu namang buring
Tasan a kagiwan o sukdang a galing
Karing bage-bage a makaparikil
King tegalan deti nung balu rang tambing
Itang nung nanu ping sukat dang dikilan
Bilang Punbarangay o Kagawad mu man,
Pablasang menasa meyakit na naman
Karing aliwa ken ing ngara pin “Kelan”
Kabaluan king nanu ing tegalan deti
O ‘kelan marine?’ matulid a sabi?
Kasi manungkulan la mang masasabi
Ding aliwa e ra gagampanan iti.
Inya makananung e tamu abiniag
Ing ‘kelan marine’ ing antiting dapat,
Susueldu la’t sabla e ra man arapat
Misan keng pabanua ing obra rang sukat
Gampanan – antimo pin ing pamag-sesyon
A peka-maulagang mirinan panaun,
Keng pamanungkulan ning metung at metung
A bibilug mismu king Administrasyon.
Nune ing balu ring keraklan, menasa
Manaya mung IRA at/o sueldu kaya;
At agiang ala lang proyektong megawa,
Sisingil da banting pamulsa rang kusa?
O iti yang tune gayuma nang tagle
Na ning pulitika nung inia dakal ne
Apaluban iti at anting asane
Makiyalkas-alkas at tatagal pane?
Ding keraklan karing sugapa na mekad
Keng ispiritu nang migit pa king alak
Ing bigsikan niti kabud yang tinalab
King pusu ring sadiang e silo keng pilak.
A nu’ inia naman buri tang’ ikutang
Karing mapad lulub keng bage makanian,
Ita nung nanu ing tune kapakayan,
Ding keraklan karen nune manintunan?
At nu’ pin meyakit uli ning ‘pork barrel,’
E la apulung Senators at Congressmen,
Ding ngeni mibulgar a kamulangan ken,
Pasari namu ning kasuapangan da ren?!
