Nukarin ing lugud? Sabi ring aliwa:
Atiyu king dapat… at e king salita
Lubus mayayakit keti king masala
Ing tune aske na, kamalan at damla;
Iti e mengaring bini mung mipunla
King pisngi ning gabun malale miyapsa,
Nune panamdam yang banal a pigampa,
A kusang manusbung king pusu magmula;
At nung makananung king simban mung mutya
Dindam meng sinibul alang pamagkunwa;
(Ambun yang mistula a mamasa-masa,
King lalanging dikut miuman pasagiwa).
Ing lugud nukarin? Sabi ring dalaga:
Atyu kanu busal punlas ding sampaga,
Potang king ardin da ring malagung rosa
Limpad-limparan no’ nitang Mariposa;
At potang ing abluk ning masiring pita
Yugyugan ne tangke mabanglung sampaga,
Ban king malale a keya na pandagpa
A’yanti mo waring taimtim sisimba,
King mipmung panirug apahiwatig na
Itang makapelam king pusu’t kaladua;
(Atyu karing aduang Denas ketang sanga
A kipmuan king saya itang lambisan da!)
Nukarin ing lugud? Ngaring baintau:
Atyu kabubuslan ning salu na mismu,
Ning malsintang tapat, dalise, masolu
A’yalang kapante babo na ning yatu;
At potang uli na ning tune sinta mu,
Ing sari kapait maging sakdal yumu;
Atyu ken ing lugud a sagad king yubu
A memilatan kang Julieta’t Romeo;
Kalupa ning kalam a binie ning Ginu,
King kapilan pa man alang pamagbayu.
(Atyu ketang inyang ipaku re’y Cristo,
King pamanatbus Na king sala ning tau!)
Ing lugud nukarin? Atyu kanu ngara
Busal nitang salu ning Indung mibata,
A e na pikabyang mitaya ing bie na
Ban ing keyang supling mibait ya sana;
At keta kaibat na, mapait man sa’ ita
Gewa nang panilan alang-alang keka;
Atyu ken ing lugud – migkamali na ka…
Indu ya pa muring mamatawad sala;
Ing pali ning dapug ning pamibabata,
E na agyung pasbuan ning Sala mu keya.
(Kasebian, yang anak, augse ne’ing matua
Dapot ing pengari… libung ali na ka!)
Nukarin ing lugud? Ating magpatune..
Atyu kanu ngara king Asu mung sese,
Potang ing tapat nang keka pamagbante
Datangan na keta ning matsura pake;
Yang asu e na ka apanganyaya bie
King agia mang iti manganib yang mate;
Atyu ken ing lugud, king kaya menese,
Ning kalulung Asu a sadiang matibe;
At keta migit pang matapat makiabe,
Kesa king kakuyug a pawase-wase.
(Kasebian yang Asu, e ne ipaglibe
Ing keyang panginuan, keng karne’t tinape!)
Ing lugud nukarin? Balang akasabi,
E misasa-usig ing pamalak deti;
Inya ing pakibat nung surian ta’ ngeni,
Ing Lugud e yamu Amanung mesabi;
Uling ing malugud a nganang sasabi,
King asbuk mu ibat – e king dapat niti…
Yan e tutung lugud at e manatili
King pusu ning taung sasabi kaniti;
Inya nung tuliran: e pin imposibli,
Agyang king animal makakit kang pilmi.
(Yang lugud, lugud yang tune alananti,
Pablasang ATIYU KING PANAMDAM ITI!)
Atiyu king dapat… at e king salita
Lubus mayayakit keti king masala
Ing tune aske na, kamalan at damla;
Iti e mengaring bini mung mipunla
King pisngi ning gabun malale miyapsa,
Nune panamdam yang banal a pigampa,
A kusang manusbung king pusu magmula;
At nung makananung king simban mung mutya
Dindam meng sinibul alang pamagkunwa;
(Ambun yang mistula a mamasa-masa,
King lalanging dikut miuman pasagiwa).
Ing lugud nukarin? Sabi ring dalaga:
Atyu kanu busal punlas ding sampaga,
Potang king ardin da ring malagung rosa
Limpad-limparan no’ nitang Mariposa;
At potang ing abluk ning masiring pita
Yugyugan ne tangke mabanglung sampaga,
Ban king malale a keya na pandagpa
A’yanti mo waring taimtim sisimba,
King mipmung panirug apahiwatig na
Itang makapelam king pusu’t kaladua;
(Atyu karing aduang Denas ketang sanga
A kipmuan king saya itang lambisan da!)
Nukarin ing lugud? Ngaring baintau:
Atyu kabubuslan ning salu na mismu,
Ning malsintang tapat, dalise, masolu
A’yalang kapante babo na ning yatu;
At potang uli na ning tune sinta mu,
Ing sari kapait maging sakdal yumu;
Atyu ken ing lugud a sagad king yubu
A memilatan kang Julieta’t Romeo;
Kalupa ning kalam a binie ning Ginu,
King kapilan pa man alang pamagbayu.
(Atyu ketang inyang ipaku re’y Cristo,
King pamanatbus Na king sala ning tau!)
Ing lugud nukarin? Atyu kanu ngara
Busal nitang salu ning Indung mibata,
A e na pikabyang mitaya ing bie na
Ban ing keyang supling mibait ya sana;
At keta kaibat na, mapait man sa’ ita
Gewa nang panilan alang-alang keka;
Atyu ken ing lugud – migkamali na ka…
Indu ya pa muring mamatawad sala;
Ing pali ning dapug ning pamibabata,
E na agyung pasbuan ning Sala mu keya.
(Kasebian, yang anak, augse ne’ing matua
Dapot ing pengari… libung ali na ka!)
Nukarin ing lugud? Ating magpatune..
Atyu kanu ngara king Asu mung sese,
Potang ing tapat nang keka pamagbante
Datangan na keta ning matsura pake;
Yang asu e na ka apanganyaya bie
King agia mang iti manganib yang mate;
Atyu ken ing lugud, king kaya menese,
Ning kalulung Asu a sadiang matibe;
At keta migit pang matapat makiabe,
Kesa king kakuyug a pawase-wase.
(Kasebian yang Asu, e ne ipaglibe
Ing keyang panginuan, keng karne’t tinape!)
Ing lugud nukarin? Balang akasabi,
E misasa-usig ing pamalak deti;
Inya ing pakibat nung surian ta’ ngeni,
Ing Lugud e yamu Amanung mesabi;
Uling ing malugud a nganang sasabi,
King asbuk mu ibat – e king dapat niti…
Yan e tutung lugud at e manatili
King pusu ning taung sasabi kaniti;
Inya nung tuliran: e pin imposibli,
Agyang king animal makakit kang pilmi.
(Yang lugud, lugud yang tune alananti,
Pablasang ATIYU KING PANAMDAM ITI!)
