Nukarin ing leguan? Sabi ring aliwa…
atiu king aslagan neng munag-sumala,
potang itang aldo malale neng yapsa
nitang alun-alun at maputing biga;
at potang ing ambun kukuldas…ban muma
king alpombrang dikut ning berding taldawa;
potang ding sampaga bubuklat dong’ kusa
ding sutla rang punlas a mamasa-masa,
kabang ketang bubug a danum ning sapa
magsalamin naman ing babatio sala.
Ing leguan, nukarin? Sabi ring mapilan…
atiu king sala na ning benging kaniglan;
potang ing malualas a kalaganapan
diriluan neng aslag ning araniang-bulan;
at potang ing angin a mabaung duman
ugyugan no’ bulung ding sablang tanaman,
ban ing kaluskus da lauk king kundiman
a anting gugulis king katahimikan,
uling king tulid ning metung a tuknangan
ating mag-haranang pusung manamdaman.
Nukarin ing leguan? Atiu kanu ngara…
king aske na nitang malsintang dalaga;
lalu nung yang tinud ing mumunang sinta,
talagang ing sabla malagu ngan kaya;
ing matuling nang buak, ding mapunge mata,
ding pisnging malare, timan a mayaga,
piblas a manayun, kimbe makayama,
takbang a balamu tutuklung musika;
pati na siwala nung magsalita ya,
malambing antimong makipag-romansa.
Ing leguan nukarin? Ating magpatutu…
atiu ketang batis ing talagang lagu;
ing kristal nang danum a ibat king ulu,
balsamu karetang miminum, mandilu;
at ketang agua nang misnang kasalusu
king metung a saug luluksung painabu;
karin…karin no’man lulungad manimu
ding Hadas at Nimpang Diosa na ning pulu;
at ing lagusgus nang bubwang king marayu,
antimong sunatang pataba king pusu.
Nukarin ing leguan? Balang kakung kitnan,
e mikakametung ing kapamalakan;
inya ing pakibat nung pitutuliran,
ING LEGUAN ATIYU KETANG PANIMANMAN
Uling ing malagu king metung nung misan,
karetang aliwa alang kabaldugan;
saka ating lagung e abut tangalan…
lagung king kaladua karin makasimpan;
inya sasabian kung mitmung katapatan,
AGYANG KING PUSALI MANAKIT KANG LEGUAN!
Neng GENARO REYES
Candaba, Pampanga
