Sasabian da ring aliwa…ing poesia canu ngara
Atyu king sablang malagung tatangalan da ring mata;
Atyu ketang mamung sulyap a timan na ning dalaga,
Atyu ketang pinan-aring magparirya king cule na;
Atyu ketang gintung yata ning masaspac a Alaya,
Atyu king sinag ning bulan busal ning benging marimla;
Atyu ketang malinatnat a punlas na ning sampaga,
Atyu caretang pacpac na ning magalo mariposa.
Ngara naman ding aliwa: ing lambing ning cawatasan
Atyu canitang lawiwing macayamang daramdaman;
Atyu ketang caluscus na ning bulung da ring tanaman,
Atyu ketang langingit da ding magdugarug a cuayan;
Atyu king salpuc ning alun caring batu king pasigan,
Atyu king e mapapayaus a lagusgus ding batisan;
Atyu king dalit ding ayup at kuliglig king mulahan,
At atyu ketang tumaila king pungul a macaduyan.
Nung nucarin ing poesia… ngara naman ding aliwa:
Atyu king sablang cayapan a king tau babie tula;
Atyu ketang pamalsintang tapat, wagas at dakila
Atyu ketang panalangin a cayausan cang Bathala;
Atyu ketang alananggang pamacamal king Bandila,
Atyu king lugud pengari caring supling na at daya;
Atyu ketang casaplalan busal na ning bie malaya,
At atyu ketang tagumpe pigcasakitan mung icua.
Sumangid na ning sablang yan, acu naman sasabian cu,
Anti ing Dios…ing poesia, agiang nucarin atiyu;
Ing Dios ing tune Poetang cayagum Na ning Amanu,
Inia atin ngang poesia ing papalto Na king yatu;
Ketang sablang maliliaring caburian ning Apung Ginu,
Ating poesiang akit na at abalangcas ning tau;
Anti reng tisud-tisuran a yugse ta’ namung batu,
Agawa mong maniulucan king maragul a Palasyu.
King leguan ating poesia, iti alang calaraman,
Dapot agiang keng matsura tin’ mu namang cawatasan;
Anti ing malating ulad a macariring lalawan,
At bagia na cusad-cusad ampon alang panimanman;
Dapot macapagmulala…ba’t agiu neng pakirasan
At ngatngatan ing ubud na ning sampaga ning tanaman;
Antimurin sasabian dang yang manuctuc a ubingan,
Oba’t biasa yang sumisi caibat nang menampalasan?
Tutu ating cawatasan king ligaya ampon tula,
Dapot lalu namang atin king cabiguan at paliasa;
Poesia itang sambitan ketang siping nang bangcala
Ning bayaning mekipamuc at mete uli ning digma;
Poesia itang agnyas at titigtig ding campana,
Poesia itang siguc na ning king sinta mepiraya;
Poesia itang gulisac ning daranup a pelangga,
At poesia’ing makiyagum king pait ning tutulung lua.
Nanu pata ing poesia nung buri meng panintunan,
Maglalawe ca king yatu… ing akit mu poesia ngan;
Capcapan me ing salu mu – imulat mung caisipan,
At keca e ya lumaut ing sibul ning cawatasan;
Ing bini na ning poesia atyu king kecang panamdam,
Nung mabiasa cang sumuri king sabla mung tatangalan;
Inia nung caniang palad mu… asacmal me ing ketawan,
Atyu na ngan ing poesia king gamat mu mipamisan!
Neng CANUTO D. TOLENTINO, P.L.I.
Ning San Luis at Minalin, Pampanga
