Oyan, malapit na naman ing alalan,
Nung inya ding balang kandidatu kanyan
A magnasang mipuk antimong Kapitan
At Kagawad pihung magmasipag la ngan.
Ati’no naman ken karing bale-bale
Pagsarian da reti ban keta ing pane
A ipangaku rang serbisyung dalise
At tapat sumuyu king baryu masese.
Ing patapik-tapik at pakaul-kaul,
Pasibayu miral bayu ing eleksyun,
Pero potang ila nang makaposisyun
Sumawa ka rugu keng kapapanintun;
Kang Kap keng pisabi yu niti nakadua
Ing mikit kayu keng opis alimbawa
Pero e siniput e ka matdas baga
King keka sinapo a matindi mung mua?
Yan keng pambarangay mung pamanungkulan
A mikakabalu, la alus keraklan,
Mikaka-mag-anak, mika-kaluguran,
At mikakapatad o mipisan-pisan.
Pero balamu yang mialiwa lang tau
King uli namu ning pulitika mismu,
Ngara ring aliwa, at yan patutuan ku
Uling tikman ku na ing kinandidatu.
Kanitang bistaman pang-Kapitan la ngan
Ding kinandidatu a milaban-laban,
A nu’ing peka-matas a botu, iti yang
Mipuk king posisyun antimong Kapitan.
Aku, binotu ke ing pisan nang Misis
Pati ring anak ku, iti yang binibit,
Inia lugal akung milukluk ‘2nd place’
Antimong Kagawad – yan e ke asungkit.
Pero makanian man, aku ing miyalal
Bilang Sektreatryu ning pangkabilugan
A barangay council ning kakung balayan
A pekatanyag pin ngening salukuyan.
At nu’ ing balayan na pin ning San Simon
A sikat ngeni keng isyung mangaragul,
At e mu king bage a makapatunkul
King pamangasiwa da ring meging mayor.
E na ku tagkil king nanu pa mang bage
A makaparikil nung ninu ing tune
Migserbisyong tapat, nu’ne ban salese
Nung nanu man iting milalu kabange.
Nune agkatan la sablang kabarangay,
Pakapilinan de ing sukat dang yalal,
E king kamag-anak me ken ing tatagal
Punong barangay at saka katiket nian.
Nung balu mung deti pera mu’ing buri ra
A sasaluran dang e ra pa pegobra,
Den e tano’ yalal agiang ing tutu na
Kapatad me iti o kadaya me pa.
Uling anggang ating sueldu mu marahil
Ing imbut da ba’lang makitagkil-tagkil
King antiting bage, dapat lang isakwil
Ban mapatpat ing keng balen pamagtaksi!
