OYAN, malapit na naman ing alalan,
Nung inya ring balang aspirante kanian,
Akit ta’no namang mamanyatang miuman
Karing balang balen at liblib a lugal.
Ing patapik-tapik, galamanung dakal
Pasibayu, ya’pa murin ing ken miral;
Ing ipangaku ra asna king karakal
King agyang balu rang masulit tuparan.
E pa man, kilub na ning aldo-aldo alus
Akit ta’la reting king dalan maglibut
At pakirasan ing pelalu kalaut
A lugal ba’la mung makilalanglubus.
At ban kekatamu buring apayabut
Ing kapagnasan dang ngara makasaup,
Kabang ing tutu na ila ing pasaup
Inya paypagal la’t mangaranup-danup.
Kilub ning aldo-aldo pamangampanya ra
E mu mamagkanu ing maging gastus da;
Ken mung para saken, krudu’t gasolina
Nu’re apanagiu ing maging sueldu ra?
Inya nung den ilang mikalmang sumambut
E ro ibawi ring salapi rang diluk
King sobra karanun da reting ginastus
A e mu mil de mil, ‘but millions of pesos’.
Menasa mengari lang magbebetu ren
A daratang mu pin karing sibabalen,
King ba’rang ipakit tapat lang memalen,
Bista’t ding aliwa alto-lumbug la ken.
Pero nung ngara mo ing imbut dang sesen
Ampon ipaglaban ing para king balen,
Mekad ding aliwa e mo man alelen
At ing katuparan e ta’ akit karen.
Pakapilinan la’t suryan miamasamas
Nung ninu’t insanu ing karapat-dapat;
E ta’ sa paytake king talan dang gamat
At pasingitan dang kwaltang ipamitag.
Uling kaybat nita… king aldo ning bukas
Ing kalulung balen ya rugung mamayad;
Karing anti karen kailangan ta’ng mingat
Ban keta ing corruption lubus nang mapatpat.
Inya nung ngara pin e kanu malaus
Ing alalan, at ing miral kanung lubus,
‘Revolutionary Government’ o ‘REV GOV’
Karing ‘TRAPO’ alang unabis milukluk.
Inyasa’t nung iti yana ing isulong
Nang DU30, nung nu’ kanitang eleksyon
2016 – yan ing matibe pangakung
Gawa na, panahun na ban ibalayun.
Kesa king tagal yang tumiket kang Sara
Bilang ‘vice president’ ning mismung anak na,
A e makapihung deti sumambut la;
Inya para nanu iti tagal ya pa?
Samantalang nung ing ‘REV GOV’ a pengaku
Nang isulong ya ing lubus mipaltutu,
E man tagal, mag- ‘Prime Minister’ya rugu;
Nung inyasa’t iti ing pekamalagu..
Nung nu’ mipalitan la ring salukuyang
Makalukluk at ding sablang mepili nang
Ipuestu, ila nang king gubyernu talan
Kabud ing ‘REV GOV’ yang ganap
