King Sabing menan a sukat pagmaragul
At e tamu dapat pabusten masaul
Laban king aliwa a e ta’ keragul
Inia king meakit a malasakit na,
Lugud at masabal king salitang mana,
Apikasundu ning BUKLUD at AGTACA,
Ampon ding opisyal balen king lugal da
A panimunan ning karelang Alkalde,
Mayor Edgar Flores at ning keyang Bise,
Kambe ning Kapitan king barangay deti,
Ed “Maganto” Yambao, ganap mepisabi
King y Gozum, bilang metung a poeta
A tune malugud king arte’t kultura,
Mangaintulid ne king sukat miduang keya
Ampon miputung a laurel king kanuan na.
Pablasang y Rodel sumangid ning ala
Yang maulang bage material a akua
Pagpilitan niting idake nang kusa
Ing kagiwan na ban e malaus matda
Ing Amanung Sisuan a paritak-ditak
Mabubura karing dila da ring anak;
Inia ban e tamu mupul pait, salpak
Karing sampid e ta’mu sukat paralpak!
At ken ding kawal na ning mal tang’ amanu
A kalili da ri Yuzon at Gallardo,
Crissot ning Baculud,Vedasto Ocampo
Ampon aliwa pa mitambayan tamu
King tune laus lub a pagmasabal
At alang imbut a pangsariling dangal;
A e kalupa ning keti mu mipalpal,
Pero ing buri na soluan na ing galal.
At e uli ning yan Ari yang metungge
Maski kenu namu wari iputung ne
Ing laurel ning dangal nung alang matibe
Kaustan king iti malyari neng yabe?
A kapara na ning inabe nang pilit
Ba’lang miragdag ding kasangga nang dikit;
Ila mu naman ken mekad ding dusildit
Umisan ding taung karela makakit.
Y Rodel agyu na, ing maging kabilang
Ding poetang ating malino parasan
Ing tagimpan da’t e la mengari bangkang
Alang katig inia bina lang magiwang.
At antining iting anak nang mapuri
Ning Minalin, sukat neng yagape iti
Karing laureadu ken a poetang sugi,
Miputungan ya keng Oktubre akinse.
King Sto. Domingo, Minalin, Pampanga
A talagang lugal a kebaitan na,
At nu’ ing mamutung ya y Poetisa
Dela Pena na ning San Luis, Pampanga.
Kambe ning makamal a Mayor ning balen,
Edgar Flores ampo y Barangay Captain,
Ed “Maganto” Yambao a ngeni incumbent
ABC Chair da ken o peka-President.
At di poeta Pol Batac na ning BUKLUD,
At Doy Gigante a pangaduang pamuntuk
Ning AGTACA ilang kayaduangan lubus
Ding opisyales a mabe, makilauk
Keng pamananggap king ginintuan a laurel
A sukat miputung king kanuan nang Rodel,
Kaustan king iting karelang Kabalen,
Poeta laureadu neng sukat dang tunggen;
(A dapat abalu ding anggang memalen,
King y Rodel Gozum dangal ne ning balen!)
