Ngening kayaldawan ning pamagmasusi
King aldo beitan ning mal tang’ bayani-ng
Y Don Pedro Abad Santos na ning lipi,
King bie delanan na… tagkil ku saguli
Banting karing mangalagung alimbawa
Ning taung itinan a e bait dusta,
Asalamin tamung ya gewa nang kusa
Ing anti nang sikwil ing biling manawa
Uling bait ya mang mabandi at tanak
Ing maganakang Don, e ya mapagmatas;
At mas pinili nang abayan no’t sukat
Ding kareng marangle ausan dang kasamak
King ba’nang asupil itang e makatud
A sistemang buring ipairal lubus
Ding milalu kapamiasang asyenderus
Keng dakayan ampon keng ausan dang unus
At nu kulang namu e ra soluan keta
Ding propetaryu ing pupul king gabun da;
Inia naman iti banting apatpat na,
Ing land reform pinla na ne kanita pa;
Pati na ing social justice nang programa
Ning Pamuntuk alang kanlap pinintas na
Inya Sentral Luzon nyang panaun a ita
Y Abad Santos meging suksuk ya karela.
Uli na pin nitang iti lipi ya mang
Mabandi, mas migit no’ pang pekiabayan
Ding lakuan dasan ning kaleldo at kauran,
Karin king marangle keng gabun lilinang
Kaya, ding kalulu ilang dapat saupan
At sukat paglualu king e karampatan,
Inya ketang bie na ya ing mitagurian
A keta ausan dang ‘Champion of the Peasants’
At tune ‘founder’ na ning ‘Socialist Party’
Keti Pilipinas – at bilang ‘Attorney’
Ing ‘legal services’ na pawa mung libri
Karing ortelanung keyang maging kliyenti.
Lima lang kasaup niting abugadu,
At nung misan ba’yang makasaup ustu
Ya pang babie kualta ing budning Don Pedro
Karing sagad keng kalukan a masolu.
At keta nung ating datang a mamitbit
Nanu mang rigalu keyang ipabalik,
Uling para kaya kailangan dang migit
Ding pasaup a ren ing karelang bitbit.
Makanyan ya kasampat a pilubluban
Ing Don kenu pa mang kaya maglapitan,
Nung inya bista man angkan yang atinan
Biryan na pang king kalulu miglayunan
Kabang king Minalin sindu na’yng kimutan
Laban king e ustu at e karampatan,
Angga na king mirate ya keng pagkeran
At isuku’yng sabla king Dios a Miglalang.
A nu’ angga ngeni ala pang malino
Ulat a nung nu’ ing bangke nang Don Pedro
Milibing ya o ali king sementeryu
Ning Minalin ketang panaun ning gulu?
Uli ning pelalung sintungan nang kubu
E ra atuldu o asabi insanu
King sakup ning barangay Sto. Rosario,
Nung nu’ mepugtu inawa y Don Pedro.
Atin pa kayang lunto bayung ‘Perico’
Karing ngeni lalapit maniawad botu,
A ngara sumuyu la mo kanung ustu –
King balen? Tabalu… ing para kanaku!
