NINU AKU? Akung ngarang simbulu ke ing Timbangan,
Dapot iti, king e patas madalas keng gagamitan.
Ing matuling – agawa keng kasing lino na ning kristal,
At ing bulak agawa keng mabayat kesa king bakal.
Ing matulid, abukut ke king kayapan milarawan,
At ing bukut atulid keng malino keng panimanman;
Nung ating matula kaku, pihung mas dakal la naman
Ding taung pamaruys da kung keng kildap ku sa’ mituran.
NINU AKU, a e silo king aslag ning Aring Aldo
Dapot king aslag ning pilak malagwa kung masisilo?
Ngeni, a nu’ ku man marap mas dakal lang mapanako
Kesa karing ali rening akasingkilan kung pago.
Natural mung pati aku, nung nu’la reti gagalo
Mayasag ku namang pihu at e na maybug mang tikdo.
Pablasang king bage iti angga’t akung mangibabo,
Alang e ku takman king bie – yan asabi kung masaklo.
NINU AKU, a e bisa o tatakut miparusan
Dapot king aldo at bengi darapat kung kasalanan?
Aku, bilang mamatula karening anak nang Adan,
Nanung galal a’yakwa ku potang lanat na’ing katawan?
Kaladwa mikabus ya pa o mitañgab nyang makanyan
King api na ning Impyernu king Oras ning Kayatulan?
Sana, alang-alang mu man king mabayat kung pepilan,
Ing Minyaklung yabe na ku karetang mipatawaran.
Anti na ning Ya ing kaku king bage yan ing mitoka
O gimpanan keting yatu banting pamatulan ku la
Ding mau keng ‘lutung ginu’ ngara pin ken ding makatwa;
Aku, king meging bie kung yan, dapat kung tanggap parusa?
NINU AKU’ng king kinatuk, e ke biklat ing pasbul ku,
At king kaku menyad limus e ke dinwang ing palad ku?
Meging pipi kung e maklak, lula dapot makakit ku,
Mepata kung pakiramdam – mamagus man ing daya ku.
Akung meging alipan na ning pibandyan a tipun ku,
Linto kung alang masabal king bie ning kaparang tau;
Nung nu’ agyang sikolu mu o mapilan a sensilyu,
Intasang e ke dininan, kasalanan iti Guino?
NINU AKU? A ngara pin mapangadi ku pin sana
Dapot kalwal kung king Templo ing dila ku matilus ya;
Aku, kabang king sikloran sangkan taimtim sisimba
Kaybat ning mapilan oras… aku pa murin ing sadya.
A e ke pa murin atwan ing akasiping kung silya,
King agya mang nandin pamu, ‘kapayapan’ ngaku keya;
At ya antimurin naman diku ne kaku’ing kanwan na,
A ngana waring sinabi: ‘peace be with you’ kaku ngana.
NINU AKU? At nanu ing ipagkatas ku kenu man
Ngening king arapan ning Dios…Keya pante-pante ta’ngan?
Ing bukud mung muli karin – mabe king Kayang karinan,
Ila ring bayu Ya datang… sumisi lang kasalanan.
A nu’ nganing Santong Sulat – ding Keya sasalpantaya,
Kamtan deti ing pengangku nang Ligaya karin Banwa;
At nung ninu ring mikabus, agpang king Banal a Biblya
Ila retang bayu silim… ‘PASIBAYU MIBAIT LA’.
