(Kaugne ning kambal a pamagmasusi tamu para king ‘Aldo ning Amanung Sisuan’ at king ‘Kayaldawan ding Pambansang Bayani,’ iting kawatasan a makarikil kaniti ya’ pamung ibie mi para king malugud yung pamamasa).
MALAMBAT nang isyu ing hinggil nung kenu
Kari Andres Bonifacio at Emilio
Aguinaldo sukat mibie ing titulo
Bilang meging minunang pamuntuk tamu.
Kang Don Emilio a panatag mu luluk
Kilub mansion nang keng gyera malaut,
Kabang ining Andres yang keta panabud
Ya ing paglaban na keng pamakipamuk?
Laban karing daywan at nu’ e malino
Ing kerarasan na nining Bonifacio
Ampo pa ing kapatad nang i Procopio
Karing gamat ding kampon nang Aguinaldo?
Pablasang kanita pa ing pulitika
Matindi na’t mekad iti masiri pa
Kesa ngeni, a nu’ ipapate ra ka
King ba’kang e maging sagabal karela.
Panahun na banting itulid ing mali
King meging papil da ring tune bayani
Ban keta ing sukat king libru mibili,
Ing makatud ampon alang pasubali.
(I Heneral Antonio Luna antimurin
Ing meging bie niti sukad dinan pansin,
Uling lalto king ya penganyaya dia ring
Mismung kabaru na keng dirya melasing).
Kalupa ning bili ding kekatang paksa
A nung kenu karen mangaintulid ‘ata
Ing pamangilala – king dagul Menila
O king Caviteño, balamu milisya!
Pablasang malino keng kasalesayan,
I Andres Bonifactio ing tune mipundar
King kanita inaus dang Katipunan,
At ining Emilio sinake ya bilang.
Akmulan ta’na king ining Aguinaldo
Akabilang de ring presidente tamu,
Pero karampatan mu naman siguru
Mibie ing para kang Andres Bonifacio.
A nu’simsam namu ning metung ing sukat
Mibie kening Andres a talagang dapat
Mirinan papuri at direktang tanggap
King rekognisyun a king aliwa miras.
Inya panahun na ban ding mangagaling
A Diputadu ken ing makapilub ‘bill,’
King i Bonifacio ing minunang diling
Meging presidente, at aliwa ining
Tau king Cavite a pasari namu
Ning pamilutlutan upaya – tinulu
Ing dayang bayaning keta mesayang mu
King kakewan a nu’ ing bie na mepugtu!
(At marahil pati ing ngeni susulung
Ning metung kareting magaling ta’ng Solon,
Ing Camp Aguinaldo, palitan de kanung
‘Camp Antonio Luna’ mekad mibalyun;
Mupin, mapalyaring dumalan yang busbus
Karayom king ‘Senate,’ bista’t king ‘lower house,
Iti mipasar ya uling makaplas lub
‘And it’s a big insult to the Aguinaldos!’)
