Abalitan ku kang poeta Frank Guinto
king ing pamamuge kang Tarik mituldu
keya, nung inia ban lubus tang’ abalu
nung ninu karen ing keti bait tutu:
I Raja Soliman a kikilalanan da
ken king Macabebe bilang bayani ra,
lalto king iti aliwa ya pala,
nung e ining Tarik Soliman talaga.
Inggil king Komisyon kasi ning kekatang
meyaus “Pambansang Pangkasalesayan”
a pamuntukan ns ning ken matenakan
at mapuring tau a dapat pugayan
At iti ya kabud ken at e aliwa
i Dr. Serena Diokno (ning Menila?)
ing magpatune king ing mesabing Raja,
aparti yang tau… i Tarik pin kaya?
At iting Komisyon Pangkasalesayan
ing opisyal a tinutuk keng bage yan,
king aparti ya pin i Raja Soliman
kang Tarik a sukat tamung parangalan.
Antining metung ya karing Pampanguenyu
a mibuwis ing bie na keng pamakibunu
laban karing tubud nang Felipe’ng lilu
ya’y Raja Soliman keng kabalwan tamu.
Pero lalto agpang king metung a libru
a inakda nang Ian Christopher Alfonso,
i Tarik ya kabud ing “The nameless Hero”
a e mekilala man bansag nung ninu?
I Robby Tantingco ning Unibersidad
na ning Holy Angel, at nu’ yang gaganap
bilang ‘vice president’ keng ‘external affairs’
at king CFKS, pamuntuk – gugunyat.
At keng anti kanyan o ‘commemoration’
a nu’y Dr. Diokno yang kwenta ‘chairperson,’
Had launched also a book, citing our very own
hero, as the “Brave Youth of Macabebe” town!
Kastila lang tala-tangkap keng istorya
ding patutu inggil keng katapangan na
ning bayani tamung e man mekilala
ing tune nang lagyu, nu’ne king bansag da
A ngara pin kabud matapang nang anak
ning mesabing balen, a e papaysindak
busal ning mapali nang pamakilamas
labang karing kampun ding mapanarampas.
At uli ning asne kanu pangaliksi
ampon maskuladu ya pangalalaki;
Keng awang, e man gumamit eran iti
akua nang mipanik nung lundagan ne’yti.
I Pedro Paterno agpang kang Tantingco,
ing kanitang labing siyam a sentenaryu,
yang king bayani ta’ memalagyu kanu
bilang Tarik, tungkul king paksa ning kuentu.
Piyakitan, nung iti ya kabud aliwa
i Tarik o’ing ngara Soliman a Raja;
nu’ne itang kabud mu masasambitla
king ya ing ‘Anak ning Macabebe’ ata?
Inya naman ban ing debati mitakpan,
iting NHCP disisyunan na n’yan
ing lerawan niting ala yang lagyu yan;
Inya ausan ta’niang “Bayani ning Tibuan!”
