Atuk-atuk ya keng ayli na i Pisuk,
nanding asaganan ke lalam sampaluk
kabang papunta ku kari matuang Enuk
ban saling metung a silyo lelut manuk.
“Ninanu ka?” ngaku, “anti ka mong’ murit
mayli kang dili mu, sasagakgak aplit?”
“Makanano” ngana “aloku ke’ing buysit
a magtinda keta a sobra kasungit.
Kuma kang metung a ‘stick’ sigarilyu,
ing agad nang sabyan e pautang kanu;
Pero karas kareng poging baintau,
alang ali; at e na pabayad ustu”.
“O nanung koneksyon ning aplit kang mayli
king anti kanyan a panugali niti?”
“Ing kakung aisip lokuan ke pin iti;
gewa ku – migpa-load kung alagang beinti”.
“Makananu me mong’ aloku kanita
nung linod na ka at memayad ka kaya?”
“E mu na panyabian” nganing pekibat na,
“Ing aku migpalod ku pin nandin kaya.
Pero e na balu ning maturak-turak
ing aku milangan kia’mu ngening abak,
Kasi pin ala na ku mang celpon, obat
menwala ya’t linod na kung agad-agad?!
Obat ing sarili ning malubo-lubo
ing pinerwisyo nang asna king kalino;
atin waring kening milangan meko
ngening yang king bulsa na ating melaso?
Ing kapusungan nang Pisuk, isipan na
masanting at alang makaskup inawa;
e na balu king yan madalas nang bunga
ning e pikasaban king taung kapara.
Glossary:
Atuk-atuk mayli – mangasayukut keng ayli
Matutak-turak – maluse-luse, mamurit-murit
Obat – bakit; Melaso – megastus
Milangan – linoku, silbahi
Malubo-lubo – makonting, konting, maki saltik
Melaso – merunut, mengatatal
Kapurit – ditak, sobra kalati
Unabis – bitasang ala
Kapusungan – biru, sisti
Makaskup inawa – makasora, makamua
E pikasaban – pikakasaman
Taung kapara – kaparang tau.
