“Pare,” nganang Pisuk kang Posung, kabang den
Maglakad la reti papunta king balen,
“Kasala ning bulan, nanan ke mang lawen
Balamu aranya ya kalagung alben”.
“Insanu karen ing amanuan mu?” ngana
Ning Posung kang Pisuk kabang ing gamat na
Makapaturu ya payarap king banwa,
“Ing malutu o ing kule La Mallorca?”
“Ay tabalu keka,” ngana nining Pisuk,
“Ot ing pakibat mu asna king kalaut”?
Ela wari adua?” pekibat na kabud
Ning kayang kumparing pingas a balugbug.
“Ay kapamu ba’ka ta’ng makasiguru
Ikutang ta’ kening daratang a tau”
Nganing Pisuk “ba’tang abalu nung ninu
Kekatang adua ing malasing nang ustu”.
Inya naman karas ning taung mesabi
Kitnan deng agad ding adwang mikumpari
At ngara pa reting banayad minyabi,
King asaganan da, asna king kasimpli:
“Koya, nandin ke pa miargung pare ku,”
Ngana ning Pisuk “Inya nung e ikmwa yu,
Atin ke pung buring ikutang kekayu”;
“Nanu wari ita?” ngana nining tau.
“Pitutwan mi kasi nung nanu ya kule
Ing bulan, pekibat ning kakung kayabe,
“Insanu karening adwang miyagape,
Nganing kumpari ku a maluse-luse!”
“Itamu pala ing pitutwan yu rugo?
Asul ya ing keni dane ning pang-ulu,
Ing kadua ya kabud ing kule malutu,
At ing kule dilo yapin ing pangatlu!!!”
Asus! Kalaut na pekibat ning kitnan
Dening mitutwa king kule na ning bulan
Asna king kasimple obat mipakanian,
Iti king uli ning sobrang kalasingan.
Ing alak nung misan, king bie na ning tau
Atin yang masanting a ibie nung kenu;
Pero yan depende king kaninu mismu
Mangaintulid iti king bage e ustu.
Alang matsura keng pamaninum alak
Balu nang ibili ning taung mas kapad
Na ing anti kanyan a masikan maldak
Potang mipasobra ya ainum mekad.
Pero nung suabi mu’t e pane dayuduk
Ing akasanayan tamung pamanalduk,
Iti pakaniaman yamung pakatudtud,
At e maging mitsa na ning balbal-buntuk.
Ibalik tamu ing paksang pisasabian
Kari Pisuk, Posung at kening akutnan
Nung nanu ya kule ing masalang bulan,
Insanu ing mas malasing ing kutang?
