Cacaluguran me ngamu ing taung yan;
King nanung bage me acacaluguran?
At balu me kaya tune kabaldugan
Ing amanung iti nung nanu kalamnan?
Iti, e ya cabud taguring macanian
Nune amanu yang sagradu parasan.
E uling y Pedro pane meng cayabe,
Paniwalan mu’ nang cacaluguran me;
Ali, alayu ken ing maging matibe
Cabaldugan niti king aliwang aske;
Ing tutu, dacal lang maulagang bage
Dapat pakibaluan king antiti, abe.
E uling yan maluat mu neng cabarcada,
Cacaluguran neng bibilang mu keta;
Ali, e me lalon king bage antita
Uling e na bala tapat lang anti’ca;
E cabud ing tau pekiabayan na ca,
Apihu tang’ iti cacaluguran ya.
E uling aldo-aldo casulu meng dulang
Asabi mung tune meng cacaluguran;
Ali, e me akit king aske macanian
Ing tune cule ning pamicaluguran;
Uling nung ala yang iturung mayap yan,
Migit ya king salut a sucat iwasan.
Ating cabarcada a maliaring keca
Mitulac king saug ning salpac at dusa;
Calupa ning sugal, alac ampon droga
Nanung matinu mung cararasan keta?
At nang’ capupuntan mung mayap carela
Nung ta’ca paytake king maling asag da?
Ala, nune itang acua mung misoso,
Mabiasang manasdap ampon mamanaco!
Calupa ning bisyung masulit ilaco
At king e maca-Dios mapad magparayo;
Cabud king macanian na ca miparoro,
Ing pawang carocan ya nang mangibabo.
Pacapilinan mo’t kilalanan mayap
Ding pakiabayan mu king nanu mang tatag;
Uling atiyu ken ing mengaring tabac,
King tulid mung salu maliaring misaldac
Cabud king e ustu at linsad dapat dapat
Carin ca menabu at miyanad ganap.
Yang cacaluguran tapat maki-cuyug
Ya ing carame mu king manawa’t mascup;
At uling e mu pin king salita cabud,
Mayayakit misan ing pamicalugud,
Yan, e sa’ mengari king anino lalsut
Neng masalang aldo, at neng bengi lalbug;
Nune pati na king dulum ning palsimi
Malagua meng akit… atiyu parati;
King canawan man o casakitan pati
Sucat mung iti e sa’ lubus mengari
King anino e pin bitasang magsilbi-ng
Ayaninag mu man king pisac ning bengi.
Pablasang ding cacaluguran matalik
Ila cabud detang maliari mong akit
Busal naman ken ning malumbe penandit
Ning kecang cabilian a magcacasakit;
Ila ring pati na king yumu at pait
Carame at macasadiang magmasakit!
At e retang taung atilu siping mu
Neng apapacan mo at kakabsing ustu,
Dapot potang gipit na ka ping masolu
Metung man ala na kang acapcap pihu;
Ken mo ngan akit ding tune ca-amigu
A talagang tapat keng pamiyabe yu!!!
