Ninu aku? Akung ining simbolo ke ing timbangan
Dapot aku king e patas apipildis ke nung misan;
Ing matuling agawa keng maputi keng kalaraman,
At ing bulak apalto keng mabayat kesa keng bakal;
Ing diretsu abukut ke keng galing mangatuliran
At ing bukut antimurin apalto keng matulid yan.
Ninu aku? Akung ining tatakut kung miparusan
Dapot king aldo at bengi darapat kung kasalanan;
Akung ining mamatula kareting anak nang Adan,
Nanung galal a akua potang lanat na’ing katawan?
Kaladua mikabius ya pa o mitangab nang makanyan,
King api na ning Impyernu king Oras ning Kayatulan?
Ninu akung e silo king aslag ning mapaling Aldo
Dapot king kislap ding pilak malagua kung masisilo?
Aku itang ibat lalam…a pilit pang magpatilo,
King milalu dalipakpak a misaldak ibat babo!
E ku balu at nung bakit nanan ku mang pakatiro,
King imbut kung kapasnawan e ku miras magparayo.
Ninu akung king kinatuk e ke biklat ing pasbul ku,
At king kaku meniad limus e ke dinwang ing gamat ku?
Meging pipi ku at maklak, bulag dapot makakit ku,
Mepata ku pakirandam mamagus man ing daya ku;
Akung meging alipan na ning pibandian a tipun ku,
Liyus ketang akung mugit ban e manabu king palsu!
Ninu akung kabanalan ing kanakung ipamitag
King kakung kaparang tau a kulang king tibe’t tatag?
Aku, a magkamit ku sa’ karing tagimpan kung limpak,
Ayamyam kung malili ka’t milisya king tune gasgas;
Akung king makanyan a bie ampon pamirapat-dapat,
Atin ku pang kapanayan king Karinan na ban miras?
Ninu aku? Akung ining makatakut king kasalanan
Dapot mapad ku keng bisyung makasirang kaisipan?
Aku, a milugmuk ganap king matsurang karaptanan,
Kenu ku isuku ining mali ku at kakulangan?
Kang igpa ko o kang indu a keta migpakaniaman,
O kang Igpang atyu Babo a kekata malugud ngan?
Ninu aku? Akung ining mapangadi ku pin sana
Dapot kalual ku king Templo ing dila ku matilus ya!
Akung kabang king Pisamban sangkan taimtim sisimba,
Kaibat ning mapilan oras…aku pa murin ing sadya,
A e ke pa murin atwan ing akasiping kung silya,
King agya mang nandin pamu “Peace be with you!” ngaku keya.
Ninu aku? At nanu ing ipagkatas ku mo’ keka
Ngening king arapan ning Dios pante-pante tamu Keya?
Uling ninu man e migit agpang king panga-lalang na,
Ing ibat king alikabuk, king gabun ing kaulyan na:
Ing bukud mung muli karin…at mabe king karinan Na
Ila retang bayu silim….PASIBAYU, MIBAIT LA!!!
