(Kaugne ning pamagmasusi ning Siyudad San Fernando para king pang-dinalan, at apat a pulu’t limang banuang Aldo nang Kebaitan ning bayaning Fernandina, iting poesia a makarikil king bie nang delanan, ya pamung ibie mi para king malugud yung pamamasa).
ING a dyes na ning Setyembre, nung lon me keng kalendaryu
Aldo yang kapyestan nang San Nicolas de Tolentino;
Antimurin ing petsang yan, bukud king mesabing Santu,
Atin pang maulang bage sukat pagmasusian tamu;
Yan e bilang Katoliku, nune bilang Fernandino,
Makapelam king meging bie na ning ilustradang tau,
A kekatang parangalan ngeni keti San Fernando
King aldo nang kebaitan, antimong anibersaryu.
Iting pang-dinalan ampon apat a pulu’t lima nang
Banuang kebaitan niting bayani ning Indung Tibuan
A meging mapuring anak ning mal tamung lalawigan
King maulang pepilan na king mabie kasalesayan;
Bista’t metung yang babai ing sabla e na pikabyang
Gewa na ngan ing agyu na para king mal tang’ balayan
Banting makasuyu ya’yti at lubus nang agampanan
Ing nanu mang malyari nang asaup king Himagsikan.
Laban karing mapaniakup a keti migsamantala
King egana-ganang bage pati na pa ing upaya
A kekatamu simsam da ding masangil a Kastila
Inyang ilang gugubyernu king sarili tamung bansa;
Makanyan lang migkapilit migkalag king tanikala
Na ning pangayalipan ding karing daywan meki-digma,
Ban keta ing katimawan ayatbus dang pawas, daya
Karing gamat da ring ganid a kekata migpasasa.
At nu’ agyang nung wari sa’kanyang kristal a balbalin
Peligroso keng bili na ing munta keta at karin,
King uli ning babai yang kasing selan ning salamin
A malyaring mipalamang keng gamat da ring salarin,
Iti e na pikanlapan nune bagkus sindu na rin
Ing imbut nang makasuyu at ayampang antimurin
Keng kimutan ing agyu na at ken partikular na pin,
Ing lingapan la at uluan ding salunan at mebaril.
Ing pekamatinding diling kapagsubukan a miras
King tepangan a bitbit na inyang mabnu lang mikaras
Di Antonio Luna at y Maskardo, king e metupad
A utos na nining Luna a meging sangkan at sukat
Ning malaguang pangasambut ding magbante karin Bagbag
Laban king puersang Kastila a karelang pipagkasias;
Dapot kapamilatan nang Nicolasa, yan meyampat
Inyang ikua nang apasbu ing mua rang mikakalabkab!
At ikua nang asalese ing karelang pisunggalit
King masampat a paralan bista’t asna king kasakit;
Makanyan ya katatag y Donya Nicolasa Dayrit
A ngeni pagmasusian ta’ ing Aldo nang panga-bait,
Bukud karing aliwa pang kabalen ta’ng masalpitik,
A sukat kilalanan king kabayanian dang pepakit;
Uling karapat-dapat mu at karela mangaintulid
Ing masampat a parangal a e sukat mipagkait;
At antimong panalala karing pati bie ra mibuwis
Ban ing tune katimawan matagumpe ta’ng akamit,
Keti mismu kekatamu, king uli ning malasakit
Ding karing bayani tamu malugud at magmasakit,
Arapan na ning Heroes Hall, atilu ken mayayakit
Deng rebulto ding bayaning Abad Santos, Rizal, Andres
At Hilario, ampo pa’ing kang Doña Nicolasa Dayrit
A nu’ ing keyang larawan atyu kilub makasabit!
