Libung banua, siyam a ralan ampon siyam a pulu’t metung
Ing bilang na kanita ning petsang banua ning Miniaklung,
Nyang king dane nang Albugan ning probinsya medalumbum
Kaibat na ning mangasikan a mituki-tuking ayun;
At nung nu’ pelalung manuk karing mulahan luluyun,
Bista’t kaugtuan ning aldo mepilit lang memanapun.
Abatiawan ku dane na ning karatig a probinsya
Ing ating higanting asuk a magpaytas babo banwa;
Iti agpang karing dindam kung keta mipapanatba,
Pasari ning engkantadong y Apu Malyari, ngara;
At ngana pang tinambayan nitang metung a makatua:
“Inaluke ne atyan ing bulkan inya sinulak ya”
At keta ing labuk na ning lahar a bigla nang mikal,
Sikmal na ning engkatando’t anggang binit peka-pakal
King malualas a marangle na ning miayaliwang lugal,
Ampon keti king Pampanga a nung nu’ digpa ing dakal;
At nung nu’ na mas matinding belibag ita ning bual-bual
A misna kapaling burak karing balayan tamung mal.
Uling ini naman kanung Sinukwan na ning Arayat,
Agpang king istorya reti yang minunang memasibas;
Inya naman ngening iting Apu Malyari ing mablas,
Ing pinakal na king gabun tone-toneladang balas;
Samantalang gilingan yang gintu ing ta’ na besibas
Ning Sinukwan, kening bunduk a ing Apu yang mimingat.
At king kapapakal niting lahar a mikakaluku
Ing dane Albugan na ning Kapampangan yang kinatmu;
At iti mipamisan ngang kinusad Banlik at Gugu,
Ning Athenas na ning bansa ing keraklan a menabu;
At maging ding aliwa pang balayan a mangarayu
Mirasan king maglipatung susuka ning Pinatubu.
Dapot waman ding mapilan king labuk e la mirasan
Albug namang alus anggang batal ing biglang dinatang;
Pablasang ding dalan danum a papuntang kailugan
Balas naman ing mitambak a kapante nitang pampang
A nung nu’ ding salipsip ning Rio Grande king Albugan
King milyaring kalamidad ilang binang miapektuan.
E la ditak ding tinangis at king sindak maybug mate
Kabang deti malisuas lang mipaniagip king marangle;
Tune alang kasimpara kaplas keta ing akit me
Ing maniniud mung pamilya ngening e ka biasang kawe;
At mekad ding mapilan ken kian na la mirame-rame
Mitambunan ketang lahar at karin mikutkut mabie.
Makanian man kabayat ing mepalyaring kalamidad,
Iti pilit pisanan ding kapatad tang’ kapus-palad;
At agya mang lasun king lub deti ing lakwan de’t sukat
Ing balen a beitan da alang sangkan ban makawat
Uling buryan da man deti ing e mako o lumipat
Indat muran, itang lahar tutulandung, mayayagas!
Pasari nyan mialiwa no’ lugal a pemamuntalan
Ding aliwang kabalen tang’ alang sukat pilisunan;
Nung inya ing kapamalan a lokal yang memaralan
Banting karing Resettlement den atin lang atuknangan;
A nung nu’ pin king Madapdap at Bulaon la mirinan
Ding keraklan a biktima na ning memakbung a bulkan.
Inya naman ngening ta’ne menahimik iting bunduk
At keta mepawing ganap karing tau itang takut,
Ngeni oren ding kabalen a karin painut-inut
Sasaka re ing balayan ketang malalam a saug;
Pablasang paniwalan dang kambe ning tetagan a lub
Ing Pampanga mibangun ya king matinding panga-lugmuk
At antining pati na ring king lokal a kapamalan,
Gagawan da ing agyu ra para king Indung Balayan,
Yan – king mayap a ugnayan maging pakpak mu king kayan
Uling likas king lipi ring Kapampangan ing makanyan;
Inya naman alang sngkan ban ing mal tang’ lalawigan,
E na akwang managumpe at makapibangun miuman.
