(Iting kawatasan a igale cu sana iniang
cabilang cu caring miparangalan antimong
peca actibung Capampangan king carelang
propesyon a nu’ cu meging “Most Outstanding
Capampangan 1999 in Pampango Literature,”
at antining iti e mipasyag at migale canita, ya
pamung ibie ku kecayu ngeni ban abasa).
Balen cung beitan, mapuri’t marangal
Busten mu ing keca malugud neng yampang
Ning pacacalulung daya mu at laman
Ing malating lamac a bitbit nang galal;
Iti e ya gintu, maulang pibandian
O diamante caya, a sobra keng camal,
Nu’ne tropeo yang tanda na’t caustan
Ning cabilang de ring sucat parangalan;
A mepili bilang ken peca-actibu
At malasakit king Sisuan tang’ Amanu,
At e sucat mate caring dila tamu
Angga na king matda ya sala ing yatu.
At waman king bie na e maging macalama
A mecapagaral matas atas bagya,
Dapot sumangid ning bili nang maluca
King arte’t cultura e meging pabaya.
Balen, gimpanan nang anti ring aliwa
Ing meging papil na antimong macudta,
At keca e meging pabayat bitasa
Uli ning masuyu ya migit king sabla.
Anti ngening metung ya caring mepili
A tune mapuri’t marangal mung sapni;
Balen ko, nung waman alangan king bili
Ing caring mabandi o matas a uri;
King penandit ayti mu cu pakilimpi
E ta’ picarine – kenu pa mang lipi;
Uling iting galal – Balen, e’te seli
Nu’ne icua te’ keng patas a panyuri!
Kase ‘nang ulaga ning yuli cung dangal
Nung ikua tia mu’yti keng capanecasan?
At maging king kecang sariling panamdam
Nanung cusuelu mu king yabut dang galal,
Ngening ica mismu lubus mung cabaluan;
Eca sucat miyabe caretang mirinan?
Ating meging “Most Outstanding Capampangan”
Ing ngara marinat a panga-paralan?
Inya lalam na ning cacaluluan Balen
Ing anac mu e re abusbusanan ken;
Pablasang ica’ta icumpara karen
Maluat neng tais ing lapis ta’ o ‘ball pen’
Keng literatura a sucat tang’ sesen
At gambulan ustu banting maging Eden
Ning tula’t ligaya a pemalugse ren
At magsimbabalung kecatang Kabalen;
Dapot busal na ning pusu’t panamdam den
E mu akit dit’man ing panga-memalen
A sumilbi mo sang’ dapat ta’lang tunggen,
Capampangan la pin keti macabalen!~
