NAPUN king bayat ning papil mung gimpanan
Ing bie mu teya mung alang picacunuan;
Nanu’t ing panganib e mu man picabiang,
O qng balu mu nang imbut dacang siluan
Yatad at pagnasan paten alang laban
Atin pa mo cayang mibait anti’ca
Qng uli ning balen itaya na’ing bie na?
Upaya’t sicanan na ning Dictadura
Ica ing matatag a sinupil queta;
Nung inia uli mu, miuman miticdo ya
O sinubling mebie, mete Democrasia!
Ngening keraklan ding atyu king tungkulan
King bage matulid e mo’ ayaligan,
At personal da mung interes, nung e man
Kapanakawan mu ing karelang gawan;
At uling anad no’ keng kapanekasan,
Nanu mu malagua da reting pikualtan.
At abilang ta’no pin karing taliri
King bage mesabi ding e masasali,
Uli ning katutuan a mas deting buri
Ing misasayaran lang taba king labi,
Kesa king akit mu karela ing tanggi
O payali mu man keng krus ding salapi.
Malagad lang bina king yatung karinan
Ding anti kang Ninoy, a e ra pikabiang
Arapan ing nanu mang peligrung datang
Akua niang isalba at abawing miuman
Ing demokratikung uring kapamalan,
King gamat ding ganid at alang pikabsyan.
Oyan, king uli ning masapsap nang nasa,
Ban kamtan ning Balen itang tune Laya,
Karin king tarmac ning / paliparang bansa
Ing mapuring Ninoy berilan deng kusa
Ding galame na ning sakim king upaya,
A nu’ angga ngeni malabug pa’ing sabla
Nung ninu ring tune maki-karaptanan
O kaya minutus kang Rolando Galman
At karing militar minasisti bilang
Kang Ninoy, nyang ume ne sanang kuldas yan;
Nung nu’ patipa ya pamu ketang eran
Berilan da ne iti dane kagulutan!
Ninoy king uli ning daya mung misalwak
Inyang mipase ka’t mibulang king Tarmac,
Meging dalan iti ban ing mal tang’ labuad
Ing tune kalayan mebawi at sukat,
King gamat ding ala nang pamalak kuldas;
At nung bigu man ing banal mung paninap,
A maging Pamuntuk na ning Pilipinas,
Banting lubus mitimawa bandang bukas,
Kang Nonoy a meging mapuri mung anak,
Malino akakit mi ing panga-tupad
Ning kapagnasan mung pasibayung sunlag
Ing masalang aldo gulut na ning ulap.
At mangibabo ing serbisyong malinis,
Matapat at alang intensyong mangupit
King kaban ning balen a magkakasakit;
Pauli nang P-noy malino masagip
Ing malambat tanang pamagkakasakit,
King parasan niting / ‘Daan na Matuwid’!
