Metung yang babaing singkwenta anyos na
Ing minta king doktor ba’nang ikonsulta,
Nung magkanu dasan ing magpa- ‘facelift’ ya
At maglupang bala’ idad pamung treynta.
Pekibat ning doktor garantisadu miss
Ing sadyang itsura yu kakung abalik,
Mupin dasan na ring dos syentos mil migit
Ning doctor’s fee, saka panulung magamit.
Kamal naman pala ngana ning babai,
Keng treynta mil doctor e pa pu malyari?
Obat itang metung yung meging pasyenti,
Sabi na kanaku migit mu pung beynti?
Dependi kasi king nung nanu ngang gawan
Keng itsura na ning pasyenti nung misan,
Ating mura, pero pota e yu naman
Aburi uli ning e masyadung sosyal.
Karing alang sapat a pera king bulsa,
Ining kakung yatul ya nang pekamura.
Pero doktor nganing keya migkonsulta
Lagu kung bagya o mibayu itsura?
Miss, gagarantyan kung ini makayanak
At mura kesa keng kakaskas keng balat.
Wayni ing tsupun ning sususu pang gatas,
Isubu mia mu yan maglupa kang anak!
(Wapin naman ninung sumabing gurang ne
Ing ‘fifty years old’ a kasiping mung bale
Nung tsupun ya ing keng balungus na ike
Ning ninu mang yan kaya makasamul pane?
Mekad agyang i Apu, i Ima o i Dara
Mapalyaring malis la pin a itsura
Nung tsupun ya rugu ing keng bunganga na
Makasubu ba’yang maglupang kuarenta.
Deng aliwa agyang medyu peligrusu
Ing pagawa ra keng katawan da mismu,
Pigagastusan da ren agyang magkanu
King agya mang deti migastus lang pihu.
Metung ne kareti ing mapagmalagu
A esposa na ning pisan kung i Balu,
Eyu na panyabian obat imbes lagu
Ya mu man sang’bagya, mesura yang lalu?
Kase, ing pakaputi rugung inodoru
Yang king lupa niti penimu siguru;
Inya imbes muti ya lupa, balu yo,
Menuling ya lupa ing ‘love’ ning pisan ku.
E balang miusu dapat pakiapusan,
Ayanti mo pin ing pati puklu nang Dang
Buri niti dagul ba’yang pibuburyan
Ding lalaki, iti makakarok misan.
Kase, e ya metung, adua o atlu ken
Ding sinisi uling mekakarok karen,
Ing siksak ning doktor a kaybat pin oren
Alang munang sisi king aranasan den!
Magkampanti tamu king pigkalam ning Dios
At e ta’ pagnasan salangsang king agus
A sobra kabilis ban e ta’ malumud
At mie busal na ning pagsalbat at lungkut!)
