King tangke na ning panaun balang bulung a malagas
Darakal la ring memalen, saskup ya ing Pilipinas;
Ding aldo-aldo mibabait, lalto tau balang oras
Ila ding maging problema king daratang tamung bukas.
King makanyan a situasyun darakal lang Pilipinu
Daragdag ing kasakitan, e na’ pigil ning gubyernu;
Nung gawan ding manungkulan ing isipan kung remedyu
Maragul yang makasaup king krisis ning bansa tamu.
Ding kekatang makasukul, a nung nu’ ing kapamalan
Pakanan no’ king aldo-aldo dapot alang pakinabang
Ilang munang saglawayan ban misulit la kakanan,
Ing masanting gawan tamu, ilang dapat papagobran.
Alimbawa ing gubyernu mitalakad yang pabrika
Ing gawan na, kareti ya, kumang talapag-obra na;
Igawa da lang tuknangan, kulungan o kaya selda
A e binang makarayu, isiping de king obra ra.
Ngaku wari anting kampu a karelang italakad
Nung libu la ding magobra, makanyan a kapasidad;
At ing pasbul a gawan da, king pabrika ya makarap
Ban keta abante ra la at malaut makatakas.
Nung ing kekatang gubyernu, agawa na ing makanyan
Makatipid yang maragul, ala ya pung babayaran;
Makanyan dang apasulit ing aldo-aldo rang papakan
Karing ngeni makasukul, matudtud mu at mamangan.
Iting kakung munikala e ya kabud alimbawa,
Sana ikong manungkulan, agising da ko pu diwa;
Uling nung den kanyang obra ilang mitutukan gawa
Pablasang e la susuwelduan, ing bansa ya pung numawa.
Paisip ke at pasuri karing lider tang’ mangatas
Ba’talang pakinabangan ding presu tang mangatikas;
Nung deti ilang magobra karing mibusning pabrikas,
Ukulan ku, mabawas na ing danup king Pilipinas.
Ding kekatang patalakad detang pabrikang salamin,
Gumamit tang’ materyales ketang balas a masanting;
Uling yan e sasaliwan, karas mu, makot kang tambing
Alang sagka o mibawal, ing gubyernu bandi na pin.
Detang magawang salamin, ding malinis at makapal
Ila ring itinda tamu karing miyaliwang lugal;
Uling mabilug a yatu malyari mong pakiribal
Pablasang ding gawa tamu, memuhunan la mung pagal.
Iting kakung munikla, nung arinan yeng panaun
Mapisabi king Kongresu at king Senado midaun;
At kaibat king Presidenti, ning bayung Administrasyun,
Mapalyaring makasaup ing maluka kung opinyun.
Kalukluk da kabalen ku, deting bayung manungkulan
A mikalmang migwagi keng kalalabas pang alalan,
Sana e ra no’ apusan ding minunang memanalan
A menasa alang gewa nune mu migpakaniaman!
Inya naman, oyan imbes pin ing bansang Pilipinas
Mibawi ya… at king utang nang maragul makabayad,
Lalu ya pang mikutkut keng obligasyun nang mitambak
Karing bansang inutangnan ding lider tang’ mengalabas.
Yaduan tamu karing bayu, ing sana maging tapat la
King balayan, ban ing bansa lubus mitimawa na ya;
At ing kasakitan ngeni a kakamtan na ning Masa
Mipalitan kapasnawan karing Magsilbi talaga!
Neng ANTONIO T. GALANG, PL
San Matias, (Sapa), Sto. Tomas, Pampanga
Darakal la ring memalen, saskup ya ing Pilipinas;
Ding aldo-aldo mibabait, lalto tau balang oras
Ila ding maging problema king daratang tamung bukas.
King makanyan a situasyun darakal lang Pilipinu
Daragdag ing kasakitan, e na’ pigil ning gubyernu;
Nung gawan ding manungkulan ing isipan kung remedyu
Maragul yang makasaup king krisis ning bansa tamu.
Ding kekatang makasukul, a nung nu’ ing kapamalan
Pakanan no’ king aldo-aldo dapot alang pakinabang
Ilang munang saglawayan ban misulit la kakanan,
Ing masanting gawan tamu, ilang dapat papagobran.
Alimbawa ing gubyernu mitalakad yang pabrika
Ing gawan na, kareti ya, kumang talapag-obra na;
Igawa da lang tuknangan, kulungan o kaya selda
A e binang makarayu, isiping de king obra ra.
Ngaku wari anting kampu a karelang italakad
Nung libu la ding magobra, makanyan a kapasidad;
At ing pasbul a gawan da, king pabrika ya makarap
Ban keta abante ra la at malaut makatakas.
Nung ing kekatang gubyernu, agawa na ing makanyan
Makatipid yang maragul, ala ya pung babayaran;
Makanyan dang apasulit ing aldo-aldo rang papakan
Karing ngeni makasukul, matudtud mu at mamangan.
Iting kakung munikala e ya kabud alimbawa,
Sana ikong manungkulan, agising da ko pu diwa;
Uling nung den kanyang obra ilang mitutukan gawa
Pablasang e la susuwelduan, ing bansa ya pung numawa.
Paisip ke at pasuri karing lider tang’ mangatas
Ba’talang pakinabangan ding presu tang mangatikas;
Nung deti ilang magobra karing mibusning pabrikas,
Ukulan ku, mabawas na ing danup king Pilipinas.
Ding kekatang patalakad detang pabrikang salamin,
Gumamit tang’ materyales ketang balas a masanting;
Uling yan e sasaliwan, karas mu, makot kang tambing
Alang sagka o mibawal, ing gubyernu bandi na pin.
Detang magawang salamin, ding malinis at makapal
Ila ring itinda tamu karing miyaliwang lugal;
Uling mabilug a yatu malyari mong pakiribal
Pablasang ding gawa tamu, memuhunan la mung pagal.
Iting kakung munikla, nung arinan yeng panaun
Mapisabi king Kongresu at king Senado midaun;
At kaibat king Presidenti, ning bayung Administrasyun,
Mapalyaring makasaup ing maluka kung opinyun.
Kalukluk da kabalen ku, deting bayung manungkulan
A mikalmang migwagi keng kalalabas pang alalan,
Sana e ra no’ apusan ding minunang memanalan
A menasa alang gewa nune mu migpakaniaman!
Inya naman, oyan imbes pin ing bansang Pilipinas
Mibawi ya… at king utang nang maragul makabayad,
Lalu ya pang mikutkut keng obligasyun nang mitambak
Karing bansang inutangnan ding lider tang’ mengalabas.
Yaduan tamu karing bayu, ing sana maging tapat la
King balayan, ban ing bansa lubus mitimawa na ya;
At ing kasakitan ngeni a kakamtan na ning Masa
Mipalitan kapasnawan karing Magsilbi talaga!
Neng ANTONIO T. GALANG, PL
San Matias, (Sapa), Sto. Tomas, Pampanga
