LALAM nang pamanungkulan Mylyn Pineda-Cayabyab
bilang Mayor na ning Lubao kilub walung banuang singkad,
king tauling dake ning kadua nang terminu ne belangkas
ing regular a pamamie na niting “Cong Dadong” Awards,
a makaparikil karing ken bait o mipanganak,
at meging uliran king bie rang mapuri’t mabulaklak.
Iti maulagang bage dininan nang importansya
ning metung karing supling nang Governor Lilia Pineda,
a migkusang linibutad king lagyu ning pulitika,
e banting gamitan na ing posisyon a telanan na
para king sarili niti, nun’e ban asuywan na’la
ring kabalen at ding maldang kekatamung kaprobinsya.
Makalma ya iting Lubao karing meging supling niti
a meging masaplala bie at tune kapuri-puri,
nung nu’ karen kabilang ya ing pekamapalad dili
a milukluk Malakanyang antimo ping Presidenti;
Di Rogelio dela Rosa at Jaime a keyang wali,
keng kule pilak a telon la sinikat ustu reti.
Nung nu’ kabilang la naman karing bantug a artista,
keng enteblado kanitang ing ausan tamung Zarzuela
popular pang alben karing teatro ampo neng magpyesta;
Ken i Ladislao Lumanog at Purita dela Rosa,
kambe nang Soledad Reyes, Eliodoro, Isabela,
king antiting uring pialben ing balayan mitanyag ya.
At karing keng kapamalan mekilala panga-tau
nung nu’ anti la katapat king balayan migserbisyu,
bukud pa kang PGMA, kabilang ya’y Atsing Cielo
karing pekamatapat a sinuyu king balen tamu;
Bukud kang Jose B. Lingad, i Eloy Baluyut, atyu
king bilungan ning aklat ding king bansa memagserbisyu.
Inya king antiting adle ya mika-ideya mekad
ing mapuri’t respetadung Mayor Mylyn P. Cayabyab,
ban keta ring Lubenians a tune at karapat-dapat
mangaintulid mirinan ken kaniting mesabing ‘Award’,
antimong pamangilala king karelang meging ambag,
den king balen a tibwan da, mirinan lugal at oras.
At kaugne na pin niti, karing mepiling ‘awardees’
para ngening 2018, den agpang king mayayakit
king ‘awards’ a mipagkalam, tune la ngang mangaintulid
pablasang den pawa la ngang mangarangal at malinis
king meging propesyon deti a sukat mipaulingid
kekata ngan, ban ipunla karing pusu at pamisip;
Ing nung makananu tamung ayapusan at agawa
itang mangasanting ampon mangalagung alimbawa,
a karelang king sarili rang bitis tinikdo kusa
ban arapan ing pagsubuk, tagumpe man o palyasa
ing maging bunga na niti, dapot ing lub da e meyna,
deti sindu ra pa murin ita’ning banal dang nasa.
Kabilang karing ngeni ken ‘recipient “Cong Dadong” Awards’
at/o mitagurian ‘as this year’s “Most Outstanding Lubenians”,
ila ri Ferdinand Beltran, businessman Raul Matias,
Joseph Ocampo (keng Sports), Agnes Trillana (Civic Act),
Senior Police Ohmor Bognot, Dennis de Dios (Culture & Arts),
Robert Reyes (Agriculture), Fr. Paule (Religious Act).
Adua keng ‘posthumous awards’: at deti ila pin kabud
di Fr. Rudy de Guzman ampo i Rogelio Vitug,
a nu’ agyang ati’nala karin king karinan ning Dios,
ing bage karapat-dapat sukat mu ring ipagkalub
para king kasuywan deti at matapat dang sinaup
king balen – angga na pin king: ing bie da reti metakmus.
Pilan la keti Pampanga ding balen a pagmasusian
deti ing kalupa na ning San Fernando at ning Lubao,
a nung nu’ ring memalen a sukat deting parangalan
mirinan oras at lugal ampon karampatan galal?
(King San Simon gewa ra na, kalukluk ning salukuyan
a Mayor ken, pero kaybat, iti ganap nang mituknang?!)
