BOTOLAN, Zambales — Arestado ang isang mister makaraan nitong mapatay ang sariling misis sa Barangay San Juan sa bayang ito.
Kinilala ng pulisya ang suspek na si Rolando Pacheco, 55, residente ng nasabing barangay.
Batay sa salaysay sa pulisya ni Vernie Pacheco, 30, anak ng suspek, tinawag siya ng kanyang tatay sa loob ng kanilang bahay at inutusan itong ibaon ang kanyang nanay na si Viginita, 53, na nasa kanilang bakuran at duguan ang ulo.
Dahil dito humingi ng saklolo sa mga kagawad ng barangay si Vernie para madala sa Kainomayan Hospital sa Barangay Taugtog ang ina, subalit ideneklara itong dead on arrival sa nasabing pagamutan.
Ang suspek ay kaagad na nadakip sa isinagawang follow-up operation ng pulisya kung saan ito nagtatago sa bahay ng kanyang kapatid.
Isasailalim naman sa physical examination ang suspek habang inihahanda na ng pulisya ang kasong parricide.
