BALANG SIMBANG bengi amulatan tana
ing bista’t marimla dakal lang sisimba;
Dakal la mu naman babaing magtinda
arap ning pisamban, keni ampo keta.
Aisip nang Oscar ing simba mu naman
ulining bukud nang king bale melakuan;
At ding kayabe na memanyimba la ngan
king primerung simbang bengi kabalenan.
Ing malagung Belen bina yang maranun,
pablasang marimla atin yang tibumbun;
Tinda na panara ampon putu lasun,
bungad ning pisamban, dane na ning pasbul.
Balang din’tang karing dakal a sisimba
kilub ning pisamban kababalaus da;
Dili nang melakuan ning Oscar kanita,
pakikisabian ne magtindang panara.
Pilan mung penandit akilala na ne
y Belen, tubu ya balen Macabebe;
Mesabing babai, likuan ali na ne,
anti yamong guardia a karin migbante.
“Ot e ka sinimba?” ngana ning babai,
e mu pasayangan iting simbang bengi”;
“O nung simba ku man” ngana naman niti,
“Mayapang ika na ing samban ku keti”.
“Oscar,” nganang Belen, “e ka sa manuksu
pota maburu la rening paninda ku;
Mayapa sali ka ban magpanigu ku,
at ba’na lang sali ding aliwang tau”.
“Nung akung sasali” ngana niting Oscar,
“pati na magtinda buri kung saliwan;
Ing anggang titinda mu bayaran ku ngan
iti, susumpa ku, alang kalaraman!”
Ing magtinda naman bayaran keng sinta
arapan ning altar patutuan ku keka”;
At kinua nong’ Oscar ding anggang panara
ampon putu lasun ketang oras a ita.
Agiang asne kabsi, pigigisan na la
ba’nang ipawaga ing katapatan na;
Inyang mayari ne, mipaintagun keta
meyari na naman ing banal a misa.
Metung yang lalaki ing minunang linual,
kitnan ne y Belen, misdan ya y Oscar;
“Megisan na murin tinda mung kapangan,
Muli tana” ngana, “e na ka paylakuan”.
“Mister,” nganing Oscar, “nanu me’ing magtinda?”
Mekibat ya’y Belen, “akung asawa na”
“Jesus Maria Josep,” mengapakurus ya
ining Oscar karing amanung dimdam na.
Bistaman marimla ikua nang mipawas
ning matikding Oscar a masyadung gagad;
Nung arapat namu lumbug ya at sukat
king penandit a ita king bage merapat.
Ngana, “bukas bengi wari’t simba ku man
ing kekang paninda e ku na lapitan;
At lubus itantu kening kakung kanwan,
iting mepalyari kaku minye aral”
(Inya ing usuk ku kekong kayanakan,
e balang malagu agad yung palsintan;
Pota mangari ko’ king kalulung Oscar,
Ing keyang pilsintan… atin neng kekasal!)
Neng Oscar Bundalian
City of San Fernando, (P)
