Inyang ala ka pa, lupa ning kutang mu
Itsura mu kaya, alang pamagbayu
Tuluyang mepawi, panamdam ning salu
Ating samut karug, kakung pangatau
Apansinan ku pin, mata mu ‘ting lungkut
Kabang kayakbe ke, ing kanakung irug
Ing pananabik mu, kandilang mepupud
Mibaling king atba, at kekang pangimut
Metung yang pag-hamun, paglisya kanaku
Panasakitan ka, eku buri rugu
Sugat a tinimu, nung sanang atantu
Ali ku sasaryan, kusang dinatang mu
Lawe mung palijim, e mu akaila
Lalung magpakaba, kakung adarama
Buti’t malilibang, ing kakung asawa
Emalit-malitan, ing balang eksena
Mesikan ing lub ku, na ika lepitan
Ban sanang abalu, deng kanakung kutang
Bigla kang mepipi, bakit ka makanian
Misteryung mibalut, lalung midagdagan
Deng pamag-biru da, king kekatang adua
Timan king labi mu, na kekang adama
Ing lumbe kinanlung, mipawi mung kusa
Penandit atakman, saguli mu pala
Nang maliaring gawan, para ika saya
Kekang kalungkutan, nasa kung mawala
Nung sanang abalik, ing milabas tang adua
Bang akit ku keka, ing tune ligaya
Eke sa tumagun, para e na mikit
Pamitagpu ta ngeni, ala yu king isip
King metung a banda, akung apaglirip
Lupa waring dati, king pusu miukit?
E mi na apigil, ing pamagpamun na
Deng kakaluguran, abe king Regina
Ing pamang-hinayang, misan pang adama
Kutang kung marakal, pakibat ala pa
Apagwari ku rin, ni eka linawe
Lua king mata mu, king pisngi milele
Pamagpamun ku keka, tapik kung manene
Para mabawas mu, tataglen mung lumbe
Pasibayung mikit, ala kung kabaluan
Eku mu rin balu, nung iti mitukyan
Panamdaman kaku, keka nang kalingwan
Napun nakadua ta, bawal nang balikdan.
