Abayan mu ku, diwang matudtud
Mangkas king plumang, makasalikut
Meging bantulut, sangkan king kilub
Sasawa ku ba, tiknang na kabud
Deting amanu, kakung tagkilan
Buung poesia, temang ‘ting laman
Nung mipawale, king pilang bulan
Isip pandaran, kakung gambulan
Baluku kung tiyak, ating mipildis
Saliwang letra, agad akakit
Panupaya pa, king pamagbalik
Datang ing oras, kakung atulid
Ing pusung bigu, makanian pala
Bie ku king yatu, alang ulaga
Ing pangatau, dapat isalba
Pati respetu, ibalik ku na
Ding pluma’t papil, kakung damputan
Milele napun, nasang gamitan
Manibayu ku, pati isipan
Nanung isulat, santing babasan
Pamalsinta ku, sukat tinubu
Babaeng buri, simba’t sinuyu
Dapot e sapat, alya tinangu
Bayung miglolo, ‘yang mekasatu
E man migsilbi, gewang poesia
Pati deng sulat, inale kaya
Nung pakisabyan, mata king mata
Amanung tapat, kayang adama
Detang binasa, kareng sinulat
Lalaki la man, alus mebijag
‘Tin pa bang kulang, ali tinalab
Ditak mung lugud, alang atanggap
Kapilan datang, ing bayung sinta
Mebigu ku man, kirut agyu na
Kabalan naku, akwang abata
Pisyag king dilag, ‘yang maulaga
Pusu ning tau, e tuturuanan
Maski kaninu, kabud daratang
Lulugud tutu, kakung panayan
Nung ali ngeni, kutang kapilan.
